فیفا ورلڈ کپ ۲۰۲۶ء کے گروپ اسٹیج میچوں کے ٹکٹوں کی قیمتوں میں سیکنڈری مارکیٹ میں نمایاں کمی دیکھی جا رہی ہے۔ ٹکٹ ڈیٹا پلیٹ فارم TicketData.com کے مطابق گزشتہ دو ہفتوں میں اوسط قیمتوں میں ۱ء۱۷؍ فیصد تک کمی آئی ہے۔ گروپ مرحلے کے ایک ٹکٹ کی اوسط قیمت ۶۸۴؍ ڈالر سے کم ہو کر ۵۶۷؍ ڈالر رہ گئی ہے۔

فیفا ورلڈ کپ ۲۰۲۶ء کے گروپ اسٹیج میچوں کے ٹکٹوں کی قیمتوں میں سیکنڈری مارکیٹ میں غیر معمولی کمی دیکھنے میں آ رہی ہے، جس نے فٹبال شائقین کی توجہ حاصل کر لی ہے۔ ٹکٹ ٹریکنگ پلیٹ فارم TicketData.com کے تازہ ترین اعداد و شمار کے مطابق گزشتہ ۱۴؍ دنوں کے دوران گروپ اسٹیج میچوں کے ٹکٹوں کی اوسط قیمت میں تقریباً ۱ء۱۷؍ فیصد کمی ریکارڈ کی گئی ہے۔ رپورٹ کے مطابق دو ہفتے قبل جہاں ایک ٹکٹ کی اوسط قیمت ۶۸۴؍ ڈالر تھی، وہ اب کم ہو کر ۵۶۷؍ ڈالر تک پہنچ گئی ہے۔ اعداد و شمار یہ بھی ظاہر کرتے ہیں کہ اگر گزشتہ ۳۰؍ دنوں کا جائزہ لیا جائے تو قیمتوں میں مجموعی طور پر ۲ء۲۱؍ فیصد تک کمی دیکھی گئی ہے۔ ایک ماہ پہلے یہی اوسط قیمت تقریباً ۶۷۲؍ ڈالر تھی۔

یہ بھی پڑھئے : ٹیموں کی اب خیر نہیں: بی سی سی آئی کی سرپرائز چیکنگ اور سخت ایکشن کی تیاری

رپورٹ کے مطابق امریکہ اور کنیڈا میں شیڈول ۹۱؍ میچوں میں سے ۸۷؍ میچوں کے کم ترین دستیاب ٹکٹ سستے ہوئے ہیں۔ خاص طور پر کیلیفورنیا میں گزشتہ ایک ماہ کے دوران ٹکٹوں کی قیمتوں میں ۵ء۲۹؍  فیصد تک کمی دیکھی گئی، جبکہ ہیوسٹن میں گزشتہ دو ہفتوں کے دوران ۸ء۲۲؍ فیصد کی نمایاں گراوٹ ریکارڈ کی گئی۔ یہ کمی ایسے وقت میں سامنے آئی ہے جب فیفا کے ٹکٹوں کی بلند قیمتیں عالمی سطح پر بحث کا موضوع بنی ہوئی تھیں۔ کئی شائقین نے شکایت کی تھی کہ ٹکٹ عام فٹبال مداحوں کی پہنچ سے باہر ہوتے جا رہے ہیں۔ اسی تناظر میں امریکی صدر ڈونالڈ ٹرمپ نے بھی ٹکٹوں کی قیمتوں پر تبصرہ کیا۔ لاس اینجلس میں امریکہ اور پیراگوئے کے درمیان افتتاحی میچ کے لیے تقریباً ایک ہزار ڈالر کے ٹکٹ پر سوال کیے جانے پر انہوں نے کہا کہ ’’اتنی بڑی رقم تو میں بھی ادا نہ کرتا۔‘‘ دوسری جانب جیانی انفینتینو نے بلند قیمتوں کا دفاع کرتے ہوئے مؤقف اختیار کیا کہ امریکی مارکیٹ میں طلب بہت زیادہ ہے، اسی لیے قیمتیں اوپر گئی ہیں۔ تاہم فیفا نے حالیہ دنوں میں ٹکٹوں کا ایک نیا بیچ بھی فروخت کے لیے جاری کیا ہے تاکہ مزید شائقین کو رسائی دی جا سکے۔ 

یہ بھی پڑھئے : راجستھان رائلز بمقابلہ گجرات ٹائٹنز، نظریں پلے آف پر مرکوز

خیال رہے کہ فیفا ۲۰۲۶ء کئی حوالوں سے تاریخی اہمیت رکھتا ہے۔ یہ پہلا فیفا ورلڈ کپ ہوگا جس میں ۴۸؍ ٹیمیں شریک ہوں گی۔ ٹورنامنٹ ۱۱؍ جون سے ۱۹؍ جولائی ۲۰۲۶ء تک امریکہ، میکسیکو اور کنیڈا کے مختلف شہروں میں منعقد ہوگا۔ ماہرین کے مطابق سیکنڈری مارکیٹ میں قیمتوں کی موجودہ کمی اس بات کا اشارہ ہو سکتی ہے کہ ابتدائی مرحلے کی غیر معمولی طلب اب کچھ حد تک متوازن ہو رہی ہے۔ اس سے وہ مداح فائدہ اٹھا سکتے ہیں جو پہلے مہنگی قیمتوں کی وجہ سے ٹکٹ خریدنے سے ہچکچا رہے تھے۔ فٹبال حلقوں میں یہ بھی خیال ظاہر کیا جا رہا ہے کہ جیسے جیسے ٹورنامنٹ قریب آئے گا، بعض میچوں کے لیے قیمتیں دوبارہ بڑھ سکتی ہیں، خاص طور پر بڑے مقابلوں اور میزبان ممالک کے اہم میچوں میں۔