روبن ورگاس اور یوہان مانزامبی کے دوسرے ہاف میں کیے گئے گولوں کی بدولت سوئزرلینڈ نے فیفا ورلڈ کپ کے گروپ بی کے میچ میں کنیڈا کو ۱۔۲؍گول سے شکست دے کر گروپ میں پہلی پوزیشن حاصل کر لی۔

 روبن ورگاس اور یوہان مانزامبی کے دوسرے ہاف میں کیے گئے گولوں کی بدولت سوئزرلینڈ نے فیفا ورلڈ کپ کے گروپ بی کے میچ میں کنیڈا کو ۱۔۲؍گول سے شکست دے کر گروپ میں پہلی پوزیشن حاصل کر لی۔ اس کامیابی کے ساتھ سوئزرلینڈ نے تین میچوں میں سات پوائنٹس حاصل کرتے ہوئے ناقابلِ شکست رہنے کا اعزاز برقرار رکھا اور کنیڈاکو پیچھے چھوڑ کر گروپ ٹاپر بن گیا۔ اب راؤنڈ آف ۳۲؍میں اس کا مقابلہ بہترین تیسرے نمبر پر آنے والی ٹیموں میں سے ایک سے ہوگا۔

 دونوں ٹیمیں پہلے ہی ناک آؤٹ مرحلے کے لیے کوالیفائی کرنے کی دوڑ میں شامل تھیں، تاہم گروپ میں سرفہرست رہنے کی اہمیت کے باعث میچ خاصا اہم تھا۔ پہلے ہاف میں دونوں جانب سے محدود مواقع بنے۔ سوئزرلینڈ کی جانب سے بریل ایمبولو گول کرنے کے قریب پہنچے، جبکہ کنیڈامنظم سوئس دفاع کے خلاف واضح مواقع پیدا نہ کر سکا۔دوسرے ہاف کے آغاز کے صرف ۳۹؍ سیکنڈ بعد میچ کا رخ بدل گیا، جب یوہان مانزامبی کے عمدہ پاس پر روبن ورگاس نے پرسکون انداز میں گیند کو جال میں پہنچا کر سوئزرلینڈ کو برتری دلا دی۔

یہ بھی پڑھئے: فیفا ورلڈکپ: وِنیسیئس جونیئر کے دو گول، برازیل کی اسکاٹ لینڈ پر فتح

۵۷؍ویں منٹ میں مانزامبی نے خود بھی گول کر کے برتری دگنی کر دی۔ انہوں نے دفاعی غلطی اور گول کیپر کی ہچکچاہٹ کا فائدہ اٹھاتے ہوئے سوئزرلینڈ کا دوسرا گول اسکور کیا۔ دو گول سے خسارے میں جانے کے بعد کنیڈانے جارحانہ حکمت عملی اختیار کی اور متعدد تبدیلیاں کیں۔ اس کا صلہ  ۷۶؍ویں منٹ میں ملا، جب متبادل کھلاڑی پرومس ڈیوڈ نے ناتھن سلیبا کے شاندار پاس پر زبردست والی شاٹ کھیلتے ہوئے گیند گول میں پہنچا دی۔

اس گول کے بعد میزبان ٹیم نے مسلسل دباؤ برقرار رکھا۔ ڈیرک کارنیلیئس کا ہیڈر معمولی فرق سے باہر چلا گیا، جبکہ اضافی وقت میں الیسٹیر جانسٹن بھی سنہری موقع ضائع کر بیٹھے جب ان کا ہیڈر سیدھا سوئس گول کیپر گریگور کوبل کے ہاتھوں میں چلا گیا۔ شدید دباؤ کے باوجود سوئزرلینڈ کے دفاع نے مضبوط کھیل پیش کیا اور ٹیم نے برتری برقرار رکھتے ہوئے تینوں پوائنٹس اپنے نام کر لیے۔

یہ بھی پڑھئے: ایرلنگ ہالینڈ نے اپنا پسندیدہ ہندوستانی پکوان بتایا، جانئے کیا ہے؟

 اس نتیجے کے بعد سوئزرلینڈ سات پوائنٹس کے ساتھ گروپ بی میں پہلے نمبر پر رہا، جبکہ کنیڈا چار پوائنٹس کے ساتھ دوسرے نمبر پر ناک آؤٹ مرحلے میں پہنچ گیا۔ گروپ کے دوسرے میچ میں بوسنیا و ہرزیگووینا نے قطر کو۱۔۳؍گول  سے شکست دے کر چار پوائنٹس حاصل کیے، تاہم بہتر گول اوسط کی بنیاد پر کنیڈا نے رنر اپ کی حیثیت سے اگلے مرحلے کے لیے کوالیفائی کر لیا۔

سوئزرلینڈ نے گروپ مرحلے میں قطر کے خلاف ڈرا، بوسنیا و ہرزیگووینا کے خلاف شاندار کامیابی اور کنیڈا کے خلاف فیصلہ کن فتح کے ساتھ ناقابلِ شکست مہم مکمل کی۔ اب راؤنڈ آف ۳۲؍ میں اس کا مقابلہ تیسرے نمبر پر آنے والی ایک کوالیفائیڈ ٹیم سے ہوگا، جبکہ کنیڈا کا سامنا گروپ اے کی رنر اپ ٹیم سے ہوگا۔