فرانس نے فیفا ورلڈ کپ ۲۰۲۶ء کے کوارٹر فائنل میں مراکش کو صفر۔۲؍ سے شکست دے کر سیمی فائنل میں جگہ بنا لی، جہاں اس کا مقابلہ اسپین اور بلجیم کے درمیان ہونے والے کوارٹر فائنل کے فاتح سے ہوگا۔ اس میچ میں کیلین ایمباپے نے نہ صرف اپنی ٹیم کو برتری دلائی بلکہ فیفا ورلڈ کپ کی ۹۶؍ سالہ تاریخ کا ایک منفرد ریکارڈ بھی اپنے نام کر لیا۔ ۲۷؍ سالہ فرانسیسی اسٹار ۳۰؍ برس کی عمر سے پہلے ورلڈ کپ میں ۲۰؍ گول کرنے والے دنیا کے پہلے فٹبالر بن گئے۔

فرانس نے فیفا ورلڈ کپ ۲۰۲۶ء کے کوارٹر فائنل میں مراکش کو صفر۔۲؍ سے شکست دے کر مسلسل دوسری مرتبہ اس حریف کو ورلڈ کپ ناک آؤٹ مرحلے سے باہر کردیا اور سیمی فائنل میں جگہ بنا لی۔ ۲۰۲۲ء کے سیمی فائنل میں بھی مراکش کا سفر فرانس کے ہاتھوں ہی ختم ہوا تھا، جبکہ اس مرتبہ بھی یہی منظر دہرایا گیا۔ فرانس کی جانب سے پہلا گول سپر اسٹار کیلین ایمباپے نے میچ کے ۶۰؍ ویں منٹ میں اسکور کیا، جبکہ صرف چھ منٹ بعد عثمان ڈیمبلے نے دوسرا گول کرکے ٹیم کی برتری دگنی کر دی۔ اس کے بعد مراکش بھرپور کوششوں کے باوجود واپسی نہ کرسکا اور مقررہ وقت تک اسکور صفر۔۲؍ ہی رہا۔ اس فتح کے ساتھ فرانس سیمی فائنل میں پہنچ گیا ہے، جہاں اس کا مقابلہ اسپین اور بلجیم کے درمیان ہونے والے کوارٹر فائنل کے فاتح سے ہوگا۔

یہ بھی پڑھئے: فیفا ورلڈکپ :کوارٹر فائنل میں سارا دباؤ انگلینڈ پر ہوگا: ہالینڈ

ایمباپے نے ورلڈ کپ کی تاریخ بدل دی
یہ میچ صرف فرانس کی فتح کے باعث ہی یادگار نہیں رہا بلکہ کیلین ایمباپے نے بھی اپنی شاندار کارکردگی سے فیفا ورلڈ کپ کی ۹۶؍  سالہ تاریخ میں ایک منفرد ریکارڈ قائم کر دیا۔ ۲۷؍ سالہ ایمباپے ۳۰؍ برس کی عمر سے پہلے فیفا ورلڈ کپ میں ۲۰؍ گول کرنے والے دنیا کے پہلے کھلاڑی بن گئے۔ ۱۹۳۰ء میں ورلڈ کپ کے آغاز کے بعد سے آج تک کوئی بھی فٹبالر اتنی کم عمر میں یہ سنگ میل عبور نہیں کر سکا تھا۔ مراکش کے خلاف ان کا گول ورلڈ کپ میں ان کا ۲۰؍ واں گول تھا، جس کے ساتھ وہ مجموعی طور پر اس اعزاز تک پہنچنے والے صرف دوسرے فٹبالر بن گئے۔

یہ بھی پڑھئے: فیفا ورلڈ کپ ۲۶ء فائنل: ہاف ٹائم شو میں جسٹن بیبر بھی پرفارم کریں گے

میسی اب بھی پہلے نمبر پر، مگر ایمباپے کی رفتار زیادہ تیز
ورلڈ کپ کی تاریخ میں سب سے زیادہ گول کرنے والوں کی فہرست میں لیونل میسی ۲۱؍ گول کے ساتھ پہلے نمبر پر موجود ہیں، جبکہ ایمباپے ۲۰؍ گول کے ساتھ دوسرے نمبر پر آ گئے ہیں۔ دلچسپ بات یہ ہے کہ میسی نے اپنا ۲۰؍ واں ورلڈ کپ گول ۳۹؍  سال کی عمر میں کیا تھا، جبکہ ایمباپے نے یہ کارنامہ صرف ۲۷؍  برس کی عمر میں انجام دیا۔ اعداد و شمار کے لحاظ سے بھی ایمباپے کی گول اسکورنگ کی اوسط زیادہ متاثر کن ہے۔ فرانسیسی فارورڈ نے صرف ۲۰؍ ورلڈ کپ میچوں میں ۲۰؍ گول کیے ہیں، جبکہ میسی نے ۳۱؍ میچوں میں ۲۱؍ گول اسکور کیے ہیں۔

یہ بھی پڑھئے: فرانس نے مراقش کو ہرا کر لگاتار تیسری مرتبہ ورلڈ کپ کے سیمی فائنل میں جگہ بنائی

گولڈن بوٹ کی دوڑ میں بھی میسی کے برابر
مراکش کے خلاف گول کے بعد ایمباپے گولڈن بوٹ کی دوڑ میں بھی لیونل میسی کے برابر آ گئے ہیں۔ دونوں کھلاڑیوں کے اس وقت آٹھ، آٹھ گول ہیں، تاہم میسی نے ایک میچ کم کھیلا ہے۔ ارجنٹائنا اب کوارٹر فائنل میں سوئزرلینڈ کا سامنا کرے گا۔ اگر ارجنٹائنا کامیاب رہا تو سیمی فائنل میں اس کا مقابلہ ناروے اور انگلینڈ کے درمیان ہونے والے میچ کے فاتح سے ہوگا۔ اس صورتحال نے ایک بار پھر شائقین میں ۲۰۲۲ء ورلڈ کپ فائنل کی یادیں تازہ کر دی ہیں، کیونکہ اگر فرانس اور ارجنٹائنا اپنے اپنے سیمی فائنل جیت گئے تو ایک مرتبہ پھر لیونل میسی اور کیلین ایمباپے ورلڈ کپ فائنل میں آمنے سامنے ہو سکتے ہیں۔

یہ بھی پڑھئے: امریکہ کے بعد بلجیم اب اسپین کے چیلنج کےلئے تیار

پنالٹی ضائع ہونے کے باوجود تاریخی کارنامہ
میچ کے ۲۸؍ ویں منٹ میں ایمباپے کو پنالٹی ملی، تاہم وہ اسے گول میں تبدیل نہ کر سکے۔ اگر وہ اس پنالٹی پر بھی کامیاب رہتے تو ورلڈ کپ میں ان کے گولوں کی تعداد ۲۱؍ ہو جاتی اور وہ مجموعی فہرست میں میسی کے برابر پہنچ جاتے، جبکہ گولڈن بوٹ کی دوڑ میں بھی سبقت حاصل کر لیتے۔ اس کے باوجود ان کے پاس اب بھی ٹورنامنٹ کے باقی میچوں میں دونوں اعزازات اپنے نام کرنے کا بھرپور موقع موجود ہے۔

یہ بھی پڑھئے: فیفا ورلڈ کپ ۲۶ء: مصر ارجنٹائنا میچ تنازع، فیفا کی ساکھ پر سوال، چوطرفہ تنقیدیں

بین الاقوامی کریئر مسلسل بلندی پر
کیلین ایمباپے نے ۲۰۱۷ء میں فرانس کی قومی ٹیم کے لیے ڈیبیو کیا تھا۔ اب تک وہ ۱۰۴؍ بین الاقوامی میچوں میں ۶۴؍ گول اسکور کر چکے ہیں۔ وہ ۱۹؍ سال کی عمر میں فرانس کے ساتھ ورلڈ کپ جیتنے والے کھلاڑی بنے تھے اور اب ۲۷؍ سال کی عمر میں ایک مرتبہ پھر ٹیم کو عالمی اعزاز دلانے کے قریب پہنچ چکے ہیں۔ فرانس اس وقت اپنے تیسرے فیفا ورلڈ کپ کے حصول سے صرف دو فتوحات دور ہے اور اس مہم میں کیلین ایمباپے ٹیم کے سب سے اہم ہتھیار ثابت ہو رہے ہیں۔