فیفا ورلڈ کپ ۲۰۲۶ء کے پہلے سیمی فائنل میں اسپین نے شاندار کارکردگی کا مظاہرہ کرتے ہوئے فرانس کو ۲۔صفر سے شکست دے کر فائنل میں جگہ بنا لی۔ آرلنگٹن، ٹیکساس کے ڈلاس اسٹیڈیم میں کھیلے گئے میچ میں میکل اویارزابال نے پہلے ہاف میں پنالٹی پر گول کیا، جبکہ پیڈرو پورو نے دوسرے ہاف میں دوسرا گول کرکے اسپین کی فتح یقینی بنا دی۔ فرانس کے اسٹار کھلاڑی کیلین ایمباپے، عثمان ڈیمبیلے اور مائیکل اولیس اسپین کے منظم دفاع کو توڑنے میں ناکام رہے۔

فیفا ورلڈ کپ ۲۰۲۶ء کے پہلے سیمی فائنل میں یورپی چیمپئن اسپین نے ایک منظم اور شاندار کھیل پیش کرتے ہوئے مضبوط حریف فرانس کو ۲۔صفر سے شکست دے کر فائنل کے لیے کوالیفائی کر لیا۔ آرلنگٹن، ٹیکساس کے ڈلاس اسٹیڈیم میں کھیلے گئے اس مقابلے میں اسپین نے ابتدا ہی سے کھیل پر اپنی گرفت مضبوط رکھی اور دفاع و حملے دونوں شعبوں میں برتری دکھائی۔ میچ کا پہلا گول ۲۲؍ ویں منٹ میں اس وقت آیا جب اسپین کو پنالٹی ملی۔ کپتان میکل اویارزابال نے بغیر کسی دباؤ کے گیند کو جال میں پہنچا کر اپنی ٹیم کو برتری دلا دی۔ اس گول کے بعد اسپین نے گیند پر کنٹرول برقرار رکھا اور مختصر پاسنگ، منظم پریسنگ اور مضبوط دفاع کے ذریعے فرانس کو مسلسل دباؤ میں رکھا۔

یہ بھی پڑھئے: انگلینڈ اور ارجنٹائناکے درمیان سیمی فائنل کا فیصلہ مڈفیلڈ کی جنگ کرے گا

دوسرے ہاف کے ۵۸؍ ویں منٹ میں اسپین نے اپنی برتری دگنی کر دی۔ ڈینی اولمو کے عمدہ پاس پر رائٹ بیک پیڈرو پورو نے بہترین انداز میں دوڑ لگائی اور پرسکون فنش کے ساتھ گیند کو گول میں پہنچا دیا۔ اس گول نے فرانس کی واپسی کی امیدوں کو تقریباً ختم کر دیا اور اسپین کی جیت کو مضبوط بنا دیا۔ اگرچہ فرانس کے پاس کیلین ایمباپے، عثمان ڈیمبیلے اور مائیکل اولیس جیسے عالمی معیار کے اٹیکرز موجود تھے، لیکن اسپین کے منظم دفاع نے انہیں مؤثر کھیل پیش کرنے کا موقع نہیں دیا۔ ایمباپے نے چند مواقع ضرور بنائے، تاہم انہیں گول کرنے کے لیے مناسب جگہ نہ مل سکی، جبکہ ڈیمبیلے بھی زیادہ اثر نہ دکھا سکے۔ 

فرانس کے کوچ ڈیڈیئر ڈیشان نے دوسرے ہاف میں تھیو ہرنانڈیز، ریان چرکی اور ڈیزیرے دوئے کو میدان میں اتار کر میچ کا نقشہ بدلنے کی کوشش کی، لیکن اسپین نے دفاعی نظم برقرار رکھا۔ فرانس کا بہترین موقع اس وقت آیا جب ایمباپے نے پنالٹی ایریا میں شاٹ لینے کی کوشش کی، مگر مارک کوکوریلا نے بروقت مداخلت کرتے ہوئے خطرہ ٹال دیا۔ بعد ازاں اوریلین شوامینی کا ہیڈر بھی ہدف سے اوپر چلا گیا۔ میچ کے آخری لمحات میں اسپین نے تجربے کا مظاہرہ کرتے ہوئے کھیل کی رفتار اپنے قابو میں رکھی۔ کوچ لوئس ڈی لا فوئنٹے نے فیّران ٹوریس، پیڈری، مارکوس یورینتے، میکل میرینو اور نیکو ولیمز کو میدان میں اتار کر ٹیم میں تازگی پیدا کی۔ دوسری جانب گول کیپر اونائی سیمون نے بھی اہم سیو کرکے فرانس کو گول سے محروم رکھا اور اسپین نے کلین شیٹ کے ساتھ مقابلہ اپنے نام کیا۔ 

یہ بھی پڑھئے: ارلنگ ہالینڈ اور ان کے ساتھیوں کا ناروے میں ہیروز جیسا شاندار استقبال

شکست کے بعد فرانس کے کپتان کیلین ایمباپے نے اعتراف کیا کہ ان کی ٹیم نے ناقص کارکردگی دکھائی اور وہ اسپین کے منظم کھیل کا توڑ نہ نکال سکی۔ انہوں نے ٹیم کی حکمت عملی اور اپنے کھیل دونوں پر مایوسی کا اظہار کیا۔ اس فتح کے ساتھ اسپین ۲۰۱۰ء کے بعد پہلی مرتبہ فیفا ورلڈ کپ کے فائنل میں پہنچ گیا ہے۔ اب وہ انگلینڈ اور ارجنٹائنا کے درمیان دوسرے سیمی فائنل کے فاتح کا سامنا کرے گا، جبکہ فرانس تیسری پوزیشن کے میچ میں میدان میں اترے گا۔