انگلینڈ کے خلاف فیصلہ کن ون ڈے میں شاندار سنچری بنانے والے روہت شرما نے اپنی فارم پر ہونے والی تنقید کو مسترد کرتے ہوئے کہا کہ بیرونی شور کبھی ان کے کھیل پر اثرانداز نہیں ہوتا۔ انہوں نے سیریز میں شکست پر مایوسی کا اظہار کرتے ہوئے کہا کہ ٹیم کو اجتماعی طور پر اپنی غلطیوں سے سیکھ کر مستقبل میں بہتر کارکردگی دکھانی ہوگی۔

انگلینڈ کے خلاف تیسرے اور فیصلہ کن ون ڈے میں سنچری بنانے والے روہت شرما نے کہا کہ وہ اپنی فارم کو لے کر ہو رہی تنقید سے بے پروا ہیں۔ انہوں نے زور دے کر کہا کہ بیرونی ’’شور‘‘ کبھی ان کے کھیلنے کے طریقے پر اثر انداز نہیں ہوا۔ ہندستان کے سابق کپتان تمام فارمیٹس میں طویل عرصے تک کم اسکور کے بعد کافی دباؤ میں اس میچ میں آئے تھے، اور ان کے انٹرنیشنل مستقبل کو لے کر قیاس آرائیاں تیز ہو رہی تھیں۔ لارڈز ون ڈے سے پہلے، انہوں نے آٹھ اننگز میں ۳۰ء۱۲؍ کی اوسط اور۸۸ء۶۰؍کے اسٹرائیک ریٹ سے صرف ۲۴۱؍ رن بنائے تھے، جس میں صرف ایک ہاف سنچری شامل تھی۔

یہ بھی پڑھئے: آج ہندوستان اور انگلینڈ کے درمیان تیسرا اور فیصلہ کن مقابلہ

روہت نے اپنی۳۴؍ویں ون ڈے سنچری اور لارڈز میں اپنی پہلی سنچری کے ساتھ ان تنقیدوں کا جواب دیا، حالانکہ ۱۱۰؍گیندوں میں ۱۳۸؍ رنوں کی اننگ ہندستان کو جیت نہیں دلا سکی کیونکہ ہندستان سیریز ۱۔ ۲؍سے ہار گیا۔ میچ کے بعد بی سی سی آئی ڈاٹ ٹی وی سے بات کرتے ہوئے، روہت نے کہا کہ ان کی توجہ ہمیشہ ٹیم کی کامیابی میں تعاون دینے پر رہی ہے، نہ کہ بیرونی آراء پر دھیان دینے پر۔ انہوں نے کہا، ’’دیکھو میرا کام بیٹنگ کرنا ہے، آؤ اور کھیلو، اپنے ملک کی نمائندگی کرو، ٹیم کی نمائندگی کرو۔ جب سے میں نے ڈیبیو کیا ہے، مجھے یہی کرنے کیلئے کہا گیا ہے، اس لئے میں یہی کرنے جا رہا ہوں۔ فیلڈنگ کرو اور ٹیم کی کامیابی میں تعاون دو۔ ابھی میری ساری توجہ اسی پر ہے۔ اور شور کو وہی رہنے دو۔ اگر شور نہیں ہوگا، تو کوئی مزہ نہیں ہوگا۔ میرا کام اندر ہے، ان کا کام باہر ہے۔ میں اسے اسی طرح دیکھتا ہوں۔ ‘‘

یہ بھی پڑھئے: کیا لارڈز روہت شرما کے ون ڈے کریئر کا آخری باب ثابت ہوگا؟

لارڈز کی اننگ میں روہت کی وراٹ کوہلی کے ساتھ طویل پارٹنرشپ بھی ایک اور یادگار لمحہ تھا۔ ان کی۱۱۳؍ رنوں کی شراکت داری ون ڈے میں دونوں کے درمیان۲۱؍ ویں سنچری شراکت داری تھی، جس سے وہ کمار سنگاکارا اور تلوکارتنے دلشان (۲۰) کو پیچھے چھوڑ کر آل ٹائم لسٹ میں دوسرے نمبر پر آ گئے، جو صرف سچن تینڈولکر اور سوربھ گانگولی (۲۶) سے پیچھے ہیں۔ انگلینڈ میں دونوں کا یہ آخری ون ڈے میچ ہو سکتا تھا، روہت نے پچ پر ان کے درمیان کی تال میل کے بارے میں بتایا۔ ’’ہم نے اپنا پورا کریئر ایک ساتھ کھیلا ہے، اس لئے ان کا پچ پر ہونا اچھا تھا۔ ہم ایک دوسرے کو بہت سمجھتے ہیں اور ہاں، درمیان میں آئیڈیاز شیئر کرنا، یہ دیکھنے کی کوشش کرنا کہ ہم کیا کر سکتے ہیں، ہمیشہ اچھا لگتا ہے۔ ‘‘

یہ بھی پڑھئے: لارڈز میں آخری ٹیسٹ کھیلنا یادگار لمحہ رہا: ہیدر نائٹ

اپنی سنچری کے باوجود، روہت نے اعتراف کیا کہ لارڈز میں انگلینڈ کے بڑے ٹوٹل کا پیچھا کرنے میں ناکام رہنے کے بعد ہندستان مایوس تھا، کارڈف میں بھی انڈر پار اسکور بنانے کے بعد ٹیم پیچھے رہ گئی تھی۔ انہوں نے کہا، ’’نتیجے سے تھوڑا مایوس ہوں کیونکہ مجھے لگا تھا کہ ہم واقعی بہت اچھا کرکٹ کھیل رہے ہیں۔ ہم نے برمنگھم میں جیسی شروعات کی تھی، ہم نے واقعی بہت اچھا کرکٹ کھیلا۔ اصل میں، کارڈف میں ہم بلے سے تھوڑے پیچھے رہ گئے۔ بورڈ پر اسکور کافی نہیں تھا۔ اور پھر یہاں بھی پیچھا کرنے کیلئے ایک بڑا ٹوٹل تھا۔ ‘‘انڈیا کے گیند بازوں کی کارکردگی اس فیصلہ کن میچ میں مشکل رہی۔ جسپریت بمراہ کی غیر موجودگی میں، پیس اٹیک نے پہلے تین اووروں میں ۲۷؍ رن دیئے اور آخری تین اووروں میں ۶۲؍ رن اور لٹا دیئے، جس سے انگلینڈ نے ایک مشکل ٹوٹل بنایا۔ اس کے باوجود، روہت نے کم تجربہ کار بولنگ یونٹ کا ساتھ دیا اور صبر رکھنے کی اپیل کی۔

یہ بھی پڑھئے: تیز گیندباز جسپریت بمراہ نے انگلینڈ میں ریکارڈ قائم کیا

انہوں نے کہا، ’’جب بولنگ کی بات آتی ہے، تو ان لوگوں نے بہت زیادہ ون ڈے کرکٹ نہیں کھیلا ہے۔ آپ کو انہیں کچھ وقت دینا ہوگا۔ لیکن ہاں، امید ہے کہ ہم اس میچ سے سیکھ سکتے ہیں، اسے اپنے حساب سے لے سکتے ہیں اور یہ یقینی بنا سکتے ہیں کہ جب ہم ایسی صورتحال سے گزریں (دوبارہ)، تو ہم بہتر کرنے کی کوشش کریں۔ ‘‘روہت نے انگلینڈ میں کھیلنے کے اپنے شوق کو بھی دہرایا، انہوں نے کہا کہ حالات انہیں مسلسل چیلنج کرتے ہیں اور ترغیب دیتے ہیں، ساتھ ہی اس بات پر زور دیا کہ ہندستان کی توجہ اب مل کر بہتر کرنے پر ہونی چاہئے۔ انہوں نے کہا، ’’مجھے انگلینڈ میں کھیلنا پسند ہے۔ اس میں کوئی شک نہیں ہے۔ ماحول، میدان، پچیں۔ جب آپ یہاں کسی بھی طرح کا فارمیٹ کھیلنے آتے ہیں، تو یہ آپ کو مختلف طریقوں سے چیلنج کرتا ہے اور ایک کرکٹر کے طور پر آپ یہی چاہتے ہیں۔ آپ ہر وقت چیلنج چاہتے ہیں۔ میں نے پچ پر اپنا وقت گزارا۔ میں نے اس کا لطف اٹھایا۔ ہم میچ ختم نہیں کر سکے اور نتیجہ اپنے حق میں نہیں کر سکے۔ لیکن ہاں، ہمیں اس سے آگے بڑھنا ہوگا اور یہ دیکھنے کی کوشش کرنی ہوگی کہ ہم کیسے بہتر ہو سکتے ہیں اور ایک گروپ کے طور پر ہم کیا بہتر کر سکتے ہیں۔ صرف انفرادی طور پر نہیں۔ یہ گروپ کے بارے میں ہے، گروپ کی طرف سے مل کر کوشش کی ضرورت ہے۔ اور مجھے لگتا ہے کہ ٹیم کو اسی پر توجہ مرکوز کرنی چاہئے۔ ‘‘