کپتان روہت شرما اور اسٹار بلے باز وراٹ کوہلی کے ٹیسٹ کرکٹ سے ریٹائر ہونے کے بعد ہندوستانی ٹیسٹ ٹیم کے نئے کپتان کیلئے جسپریت بمراہ اور شبھمن گل کے درمیان مقابلہ شروع ہوچکا ہے۔

 کپتان روہت شرما اور اسٹار بلے باز وراٹ کوہلی کے ٹیسٹ کرکٹ سے ریٹائر ہونے کے بعد ہندوستان کے ہیڈ کوچ گوتم گمبھیر نے مبینہ طور پر بی سی سی آئی سے ٹیم پر مکمل کنٹرولکیلئے کہا ہے۔ روزنامہ’’ جاگرن‘‘ میں شائع ایک رپورٹ کے مطابق گمبھیر ہندوستانی کرکٹ کے سپر اسٹار کلچر کو ختم کرنے کے خیال سے اس سیٹ اپ میں آئے تھے۔ گوتم گمبھیر نے مبینہ طور پر روہت شرما اور وراٹ کوہلی کو ٹیسٹ سیٹ اپ سے ہٹانے میں کلیدی کردار ادا کیا۔ دورہ انگلینڈ کیلئے ہندوستانی ٹیم کے انتخاب سے ایک ہفتہ قبل گمبھیر اور سلیکشن کمیٹی کے چیئرمین اجیت آگرکر نے سینئر کھلاڑیوں پر واضح کردیا تھا کہ ٹیم اب نوجوان کھلاڑیوں کے ساتھ آگے بڑھنا چاہتی ہے، یہی وجہ تھی کہ پرانے کھلاڑیوں نے ریٹائرمنٹ کا اعلان کردیا۔ 

یہ بھی پڑھئے: ڈبلیو ٹی سی ۲۰۲۵ء: آئی سی سی نے اب تک کی سب سے زیادہ انعامی رقم کا اعلان کیا

کیا روہت اور وراٹ کی ریٹائرمنٹ میں گمبھیر کا ہاتھ ہیں ؟
یہ پہلا کیس ہے جہاں کسی ہیڈ کوچ نے ہندوستانی کرکٹ ٹیم کے دو بڑے اسٹارز کو باہر کرنے میں کلیدی کردار ادا کیا ہے۔ اب تک ہندوستانی ٹیم اس کے کپتان چلاتے تھے۔ تمام اہم فیصلے کپتان نے کئے۔ کوچ کے طور پر کوئی بھی بڑا نام کیوں نہ آئے، وہ ہمیشہ پردے کے پیچھے ہی رہے۔ رپورٹ میں مزید کہا گیا کہ اگر شبھمن گل کپتان بنتے ہیں تو وہ گوتم گمبھیر کی ہر بات سنیں گے کیونکہ وہ ابھی نوجوان ہیں۔ انہیں مستقبل کے سپر اسٹار کے طور پر پیش کیا جا سکتا ہے، لیکن وہ ابھی تک اس مرحلے پر نہیں ہیں جہاں وہ گمبھیر کے فیصلوں کو چیلنج کر سکیں۔ موجودہ ہندوستانی ٹیسٹ ٹیم میں واحد کرکٹر جو شاید گمبھیر کی حکمت عملی کا مقابلہ کرسکتا ہے وہ تیز گیند باز جسپریت بمراہ ہیں۔ 

یہ بھی پڑھئے: دورۂ انگلینڈ پر۵؍کھلاڑیوں پر توجہ مرکوز

گِل کی کپتانی گمبھیر کے مطابق ہوگی
بمراہ کو روہت شرما کے دور میں نائب کپتان مقرر کیا گیا تھا اور وہ انگلینڈ اور آسٹریلیا میں تین ٹیسٹ میچوں میں ہندوستان کی قیادت بھی کر چکے ہیں۔ چونکہ وہ ایک تیز گیند باز کے طور پر بہت قیمتی ہیں اور ان کے کام کے بوجھ کو سنبھالنے کی ضرورت ہے، اس لئے انہیں کل وقتی کپتانی دینا ممکن نہیں تھا۔ لہٰذا، اگر گِل کو کپتان مقرر کیا جاتا ہے، تب بھی گمبھیر کے پاس ٹیم پر مکمل کنٹرول رہے گا جیسا کہ وہ چاہتے ہیں۔ روی شاستری اور راہل ڈراوڑ کی حالیہ مثالیں لے لیں۔ وہ ہمیشہ وراٹ کوہلی اور روہت شرما کے حامی رہے ہیں۔ نئی رپورٹ میں دعویٰ کیا گیا ہے کہ اب روہت، کوہلی اور روی چندرن اشون جیسے پرانے تجربہ کاروں کی ریٹائرمنٹ کے بعد تمام فیصلے گوتم گمبھیر کریں گے۔ رپورٹ میں کہا گیا کہ نیوزی لینڈ کے خلاف ہوم سیریز اور آسٹریلیا میں بارڈر گواسکر ٹرافی ہارنے کے بعد گمبھیر نے بورڈ سے مکمل آزادی کی درخواست کی تھی۔