فریضۂ حج ادا کرنے والوں کی تعداد بڑھ رہی ہے کیونکہ وسائل بڑھ گئے ہیں۔ مگر حج سے حقیقی استفادہ کرنے والوں کی تعداد گھٹ رہی ہے۔دلوں کا حال خدا ہی جانتا ہے مگر جب حج کی ادائیگی کے باوجود زندگی تبدیل ہوتی دکھائی نہ دے تو حیرت اور افسوس ہوتا ہے۔ کاش ہم حج کے بعد ویسا ہی بدلیں جیسا کہ بدلنا چاہئے !

عازمین ِحج کے قافلے اپنی مقدس منزل کی جانب رواں دواں ہیں۔ دلوں میں شوقِ دیدارِ حرم کی بیقراری اور تڑپ، آنکھوں میں مدینہ منورہ کی نورانی فضاؤں کے دلنشیں خواب، اور لبوں پر لبیک کی مترنم صدائیں، یہ سب مل کر ایک ایسی روح پرور فضا تشکیل دیتے ہیں جہاں ہر قدم بندگی کی نئی جہت سے روشناس ہوتا ہے۔ حج محض ایک سفر نہیں، بلکہ باطن کی صفائی، ارادوں کی ازسرِ نو تشکیل اور ربِّ کائنات سے تعلق کی گہرائی کو پھر سے دریافت کرنے کا ایک جامع اور ہمہ گیر تجربہ ہے۔ یہی وہ ساعت ِسعادت ہے جب دنیاوی مشاغل پسِ پشت رہ جاتے ہیں اور بندہ اپنے خالق کے حضور سراپا عجز و نیاز بن کر، ایک نئی روحانی زندگی کی دہلیز پر قدم رکھتا ہے۔

اسلامی شعائر میں حج ایک ایسا فریضہ ہے جو بیک وقت تاریخ، تہذیب، روحانیت اور اجتماعیت کو اپنے اندر سموئے ہوئے ہے۔ یہ محض چند ایام پر مشتمل ایک مذہبی سفر نہیں بلکہ ایک ہمہ گیر تجربہ ہے، جس میں انسان اپنی ذات کے خول سے نکل کر ایک وسیع تر انسانی و ایمانی کائنات میں داخل ہوتا ہے۔ تاہم عصرِ حاضر میں جب ہم اِس فریضہ کی ادائیگی کو دیکھتے ہیں تو ایک بنیادی سوال ذہن میں ابھرتا ہے: کیا یہ عظیم عبادت اپنی حقیقی روح کے ساتھ ادا کی جا رہی ہے یا رفتہ رفتہ ایک رسمی عمل میں ڈھلتی جا رہی ہے؟

یہ بھی پڑھئے: اصلاحِ معاشرہ کیلئے دینی تعلیمات پر عمل ضروری

یہ سوال ایک سنجیدہ فکری جستجو کا تقاضا کرتا ہے کیونکہ حج کی اصل روح کو سمجھے بغیر اس کی رسمی ادائیگی، اپنے جوہر سے محروم ہو تی ہے۔ یاد رہنا چاہئے کہ حج کی بنیادجس سنت ِ ا براہیمی پر قائم ہے، وہ اطاعت، ایثار اور غیر مشروط سپردگی کا استعارہ ہے۔ یہ وہی روایت ہے جس میں ایک باپ اطاعت ِخداوندی میں اپنے بیٹے کی قربانی کے لئے آمادہ ہوتا ہے، ایک ماں اپنے بچے کے تشنہ لبوں کی سیرابی کے لئے بے آب و گیاہ وادی میں دوڑتی ہے، اور ایک عظیم انسان اپنے رب کے حکم پر اپنی تمام ترجیحات کو پسِ پشت ڈال دیتا ہے۔ یہی وہ روح ہے جو حج کو محض عبادت نہیں بلکہ ایک ’’تجربۂ بندگی ‘‘بناتی ہے، ایسا تجربہ جس میں انسان اپنے وجود وترجیحات کی ازسرِ نو تشکیل کرتا ہے۔

مگر اس عہد میں جب لاکھوں افراد اس فریضے کی ادائیگی کے لئے حرم کی سرزمین پر جمع ہوتے ہیں، تو اس تجربے کی نوعیت میں ایک نمایاں تبدیلی محسوس ہوتی ہے۔ انتظامی سہولیات، جدید ٹیکنالوجی اور منظم نظام نے حج کو بلاشبہ آسان بنا دیا ہے، تا ہم آج بھی حج کا باطنی اور فکری پہلو اکثر پس منظر میں چلا جاتا ہے، گویا’’ادائیگی‘‘باقی رہ جاتی ہے، مگر’’معنویت‘‘بتدریج کمزور پڑتی ہوئی محسوس ہوتی ہے۔ احرام، جومساوات، عجز اور سادگی کی علامت ہے، آج بھی پہنا جاتا ہے، مگر اس کے پیچھے کارفرما تصورِخودی کی نفی اور برابری کا شعورکتنی حد تک دلوں میں اترتا ہے؟ طواف کیا جاتا ہے، مگر کیا واقعی انسان اپنی زندگی کے مرکز کو پہچان پاتا ہے؟ سعی کی جاتی ہے، مگر کیا حضرت ہاجرہؑ کی جستجو اور یقین کی کیفیت ہمارے اندر زندہ ہوتی ہے؟ عرفات میں قیام ہوتا ہے، مگر کیا وہ لمحہ،احتساب اور خود آگہی کا ذریعہ بنتا ہے؟ رمی ِجمرات کی جاتی ہے، مگر کیا انسان اپنے’’ باطن کے شیاطین‘‘کے خلاف کوئی حقیقی عزم لے کر لوٹتا ہے؟ یاد رہنا چاہئے کہ عبادات کی اصل قدر ان کے اثرات میں ہوتی ہے، نہ کہ رسمی ادائیگی میں۔ اگر ایک شخص حج سے لوٹ کر بھی اپنے رویے، معاملات اور ترجیحات میں کوئی تبدیلی محسوس نہ کرے تو پھر خود سے سوال کرنا ضروری ہوگا کہ حج سے ہم نے کیا پایا۔ 

یہ بھی پڑھئے: فتاوے: قران، تمتع اور افراد: حج کی تین اقسام ہیں

اِس عبادت کی معنوی جہت کو واضح کرتے ہوئے اللہ کے رسولؐ نے ارشاد فرمایا: ’’جس نے (خالص)  اللہ کے لئے حج کیا، اور اس کو بے حیائی اور بُری بات سے آلودہ نہیں کیا، وہ حج سے اس طرح واپس ہوتا ہے، جیسے آج ہی اس کی ماں نے اس کو پیدا کیا ہو۔‘‘ (صحیح البخاری: ۱۵۲۱) یہ روایت حج کے اُس باطنی انقلاب کی طرف اشارہ کرتی ہے جو انسان کو ایک نئی اخلاقی اور روحانی ابتدا عطا کرتا ہے۔ لیکن اس بشارت کو محض ایک رسمی اجر کے طور پر نہیں بلکہ ایک ذمہ داری کے طور پر بھی سمجھنا چاہیے یعنی ایسی پاکیزگی جو بعد کی زندگی میں بھی برقرار رکھی جائے۔

حج کے دوران اجتماعی نظم و ضبط اور اخلاقی رویوں کا مشاہدہ بھی ہمیں ایک ایسے منظرنامے سے روشناس کراتا ہے جہاں کہیں صبرو ایثار کی روشن مثالیں ملتی ہیں، اجنبی افراد ایک دوسرے کی مدد کرتے نظر آتے ہیں،تو کہیں بے صبری، بدنظمی اور ذاتی ترجیح کا غلبہ بھی دکھائی دیتا ہے۔ یہ تضاد دراصل اس بات کی نشاندہی کرتا ہے کہ حج کو بطور ایک اخلاقی تربیت گاہ سمجھنے کا شعور ہنوز ادھورا ہے۔یہاں ایک اہم پہلو’’اجتماعی شعور‘‘کا بھی ہے۔ حج محض انفرادی عبادت نہیں بلکہ ایک عالمی اجتماع ہے، جہاں امت ِ مسلمہ اپنی وحدت کا عملی اظہار کرتی ہے لیکن اگر اس اجتماع میں نظم، برداشت اور باہمی احترام کی کمی نظر آئے تو یہ اس بڑے  مقصد کو متاثر کرتی ہے جو حج کے ذریعے حاصل کیا جانا چاہئے تھا۔ حج ہمیں صرف عبادت نہیں  بلکہ صبر و ایثار کے ساتھ ’’اکٹھا جینے ‘‘کا سلیقہ بھی سکھاتا ہے،اوریہی سلیقہ آج حد درجہ درکار ہے۔

یہ بھی پڑھئے: زندگی کی تین اہم بنیادیں: فکر، عزم اور کاوش