۲؍فروری کی دوپہر کو پٹنہ کے گاندھی میدان کے جنوبی جانب کا ماحول اس وقت انتہائی کشیدہ ہو گیا جب یو جی سی کے نئے ضابطوں کے نفاذ کا مطالبہ کرنے والے طلبہ اور نوجوانوں کے جلوس پر پولیس نے لاٹھی چارج کردیا۔ پلے کارڈز اٹھائے ہوئے یہ ان نوجوانوں نے نہایت پرامن طریقے سے آگے بڑھنے کی کوشش کی، لیکن پولیس کی بھاری نفری نے رکاوٹیں کھڑی کر کے سڑک کو بلاک کر دیا اور انہیں آگے بڑھنے سے روک دیا۔

۲؍فروری کی دوپہر کو پٹنہ کے گاندھی میدان کے جنوبی جانب کا ماحول اس وقت انتہائی کشیدہ ہو گیا جب یو جی سی کے نئے ضابطوں کے نفاذ کا مطالبہ کرنے والے طلبہ اور نوجوانوں کے جلوس پر پولیس نے لاٹھی چارج کردیا۔ پلے کارڈز اٹھائے ہوئے یہ ان نوجوانوں نے نہایت پرامن طریقے سے آگے بڑھنے کی کوشش کی، لیکن پولیس کی بھاری نفری نے رکاوٹیں کھڑی کر کے سڑک کو بلاک کر دیا اور انہیں آگے بڑھنے سے روک دیا۔

وہاں موجودمیڈیاوالے تو ’بریکنگ نیوز سنسنی‘ پیدا کرنے کی جستجو میں، مظاہرین اور پولیس کے درمیان’جنگ‘  کو ہوا دینے پر آمادہ دکھائی دے رہے تھے۔ لائیو نشر کرنے والے بیشتر اینکرز چیخ رہے تھے کہ ’’دیکھو، دیکھو، پولیس اور طلبہ کے درمیان تصادم ہوا۔‘‘ ایک اینکر نے تو یہاں تک بتادیا تھا کہ پولیس اور طلبہ کے درمیان گھمسان کی جنگ شروع ہو گئی ہے۔اس طرح سے یہ ظاہر کرنے کی کوشش کی جارہی تھی کہ وہاں احتجاج کرنے والے طلبہ اور نوجوان پہلے سے سوچے سمجھے منصوبے کے تحت تشدد اور تصادم کیلئے وہاں پہنچے تھے۔

یہ بھی پڑھئے: کارپوریشن انتخابات: اتنا غیر واضح اور گنجلک منظر نامہ کبھی رہا؟

تاہم، ’میڈیا سنسنی‘ سے قطع نظر، ملک کے دیگر خطوں کی طرح گزشتہ دنوں پٹنہ میں بھی ایک عام سا مظاہرہ ہوا تھا۔ اس مظاہرے کا مقصد کالج اور یونیورسٹی کیمپس میں طلبہ کے ساتھ ہونےوالے امتیازی سلوک کو روکنے کیلئے جاری کردہ یوجی سی کے نئے ضوابط کی حمایت کرنا تھا۔ یہ جلوس پٹنہ کالج سے گاندھی میدان میں جے پی گولمبر تک مارچ کیا۔ تاہم، اس سے پہلے کہ مارچ اپنے اختتام کو پہنچ پاتا، طلبہ اس وقت مشتعل ہوگئے جب پولیس کی بھاری نفری نے رکاوٹیں کھڑی کرکے سڑک کو بلاک کردیا۔ احتجاج کرنے والے طلبہ کی جانب سے سوشل میڈیا پر جاری کی گئی ویڈیوز میں دکھایا گیا کہ کس طرح پولیس غیر مسلح طلبہ اور نوجوانوں کو دھکے دے رہی ہے، ان کے خلاف لاٹھیاں استعمال کر رہی ہے، انہیں زبردستی حراست میں لے رہی ہے اور جبراً اُٹھا اٹھا کر گاڑیوں میں ڈال رہی ہے۔ دیکھا جائے تو’یو جی سی‘ کے نئے ضوابط کے اطلاق کی مانگ کرنےوالے طلبہ کا برہم ہونا غلط نہیں تھا کیونکہجب یو جی سی کے نئے ضابطے جاری ہونے پر نام نہاد’جنرل کیٹیگری‘ کے نمائندے سڑکوں پر اُترے تھے اور ضابطوں کو منسوخ کرنے کا مطالبہ کررہے تھے تو  ہنگامہ برپا  کرنے والوں کےساتھ انہیں پولیس اہلکاروںکاکردار دوستانہ تھا۔

یہ بھی پڑھئے: ایوان میں وندے ماترم پر۱۰؍ گھنٹے بحث،دیانتدارانہ جائزہ لیا جائے کہ حاصل کیا ہوا؟

رپورٹس کے مطابق سپریم کورٹ نے یو جی سی ریگولیشنز۲۰۲۶ء کا فوری نوٹس لیا اور کچھ دنوں کیلئے اس پر عبوری اسٹے جاری کر دیا۔ یہ اب کافی متنازع ہوتا جا رہا ہے۔ نام نہاد ’جنرل کیٹیگری‘ خوش ہے کہ عدالت اس کے حق میں کام کر رہی ہے تاہم، او بی سی، ایس ٹی اور ایس سی کمیونٹیز کے طلبہ اور نوجوان، جو عدالت کے فیصلے اور اس کے استدلال سے مجروح ہوئے ہیں، براہ راست ’عدلیہ کی غیر جانبداری‘ پر سوال اٹھا رہے ہیں۔

یہ پٹنہ میں احتجاج کرنے والے طلبہ اور نوجوانوں  کی برہمی کے اظہار سے بھی پتہ چلتا ہے۔ جیسا کہ آپ جانتے ہیں، خود یو جی سی کے سروے کے اعداد و شمار سے پتہ چلتا ہے کہ۲۰۱۹ء اور۲۰۲۴ء کے درمیان ملک بھر کی یونیورسٹیوں اور کالجوں میں ذات پات کی بنیاد پر امتیازی سلوک کی شکایات میں۱۱۸؍ فیصد کا اضافہ ہوا ہے۔طلبہ نے عدلیہ کو مخاطب کرتے ہوئے واضح طور پر کہا کہ ذات پات اور ملک میں جاری نسلی امتیازات، خیالی تصورات یا ماضی کی چیز نہیں ہیں بلکہ یہ سب ہمارے تعلیمی اداروں اور پورے معاشرے میں روزمرہ کی سفاک حقیقت ہیں۔کیا محض ’ذات سے پاک معاشرے‘کا مطالبہ کردینے سے روہت ویمولا اور ڈاکٹر پائل تڑوی کے ادارہ جاتی قتل، یا اینجل چکما کے نسلی قتل کیلئے انصاف مل جائے گا؟

یہ بھی پڑھئے: بی ایل اوز کی موت پربے حسی کا عالم یہ ہےکہ نہ کمیشن کوئی ذمہ داری قبول کررہا ہے، نہ حکومت

غور طلب ہے کہ سپریم کورٹ میں اس کیس کی اگلی سماعت ہونے والی ہے،  ایسے میں یہ دیکھنا باقی ہے کہ اُس وقت کیا فیصلہ آتا ہے۔ تاہم، ملک بھر میں طلبہ اور نوجوانوں کی ایک بڑی آبادی اس مسئلے پر تقریباً روزانہ سڑکوں پر ریلیاں اور مظاہرے کررہی ہے۔۳۱؍ جنوری کو، بائیں بازو سے تعلق رکھنے والے طلبہ اورنوجوانوں کی تنظیم ’انقلابی نوجوان سبھا‘ اور’اے آئی ایس اے‘ کی طرف سے مشترکہ طور پر شروع کی گئی ایک ملک گیر مہم کا انعقاد کیا گیا تھا، جس میں یو جی سی کے نئے ضوابط کے نفاذ کا مطالبہ کیا گیا تھا۔ ’اتیا چار، ادھیکار نہیں‘ اور ’ذات پات کے امتیاز کو جائز قرار دینا ناقابل قبول ہے‘ جیسے نعروں کے ساتھ احتجاج کیا گیا۔ ان کا کہنا تھا کہ ’’یو جی سی کے رہنما خطوط کو لاگو کریں، روہت ایکٹ کو نافذ کریں۔‘‘