چیف جیوڈیشل مجسٹریٹ نے استغاثہ کے شواہد کو ناکافی پایا ،دفاعی وکلاء کے دلائل کو درست تسلیم کرتے ہوئے فیصلہ سنایا۔

طویل عرصے سے زیرِ بحث کلیان ریلوے اسٹیشن حملہ کیس میں مہاراشٹر نونرمان سینا ( ایم این ایس) کے سربراہ راج ٹھاکرے کو ایک بڑی قانونی کامیابی حاصل ہوئی ہے۔ تھانے کی ایک مقامی عدالت نے ۱۸ ؍سال پرانے اس ہائی پروفائل مقدمے کا فیصلہ سناتے ہوئے راج ٹھاکرے اور ان کے دیگر ۶؍ ساتھیوں کو تمام الزامات سے باعزت بری کر دیا ہے۔ چیف جیوڈیشل مجسٹریٹ نے استغاثہ کی طرف سے ٹھوس ثبوت پیش نہ کرنے اور دفاعی وکیلوں کے دلائل کو درست تسلیم کرتے ہوئے یہ اہم فیصلہ صادر فرمایا۔

یہ بھی پڑھئے : منتقلی کی پالیسی کیخلاف نرسوں کا احتجاج، تبادلے کے احکامات واپس لینے کا مطالبہ

تفصیلات کے مطابق ۲۰۰۸ء میں کلیان ریلوے اسٹیشن پر ریلوے میں ملازمتوں کے لیے امتحانات منعقد کیے جا رہے تھے۔ اس امتحان میں شرکت کیلئے ریاست سے باہر خصوصاً بہار اور اتر پردیش سے بڑی تعداد میں نوجوان آئے تھے۔ اس دوران مہاراشٹر نونرمان سینا نے ریلوے بھرتیوں میں مقامی مراٹھی نوجوانوں کو نظر انداز کر کے غیر مقامی امیدواروں کو ترجیح دینے کا الزام لگاتے ہوئے شدید احتجاج کیا تھا جس نے بعد میں پُرتشدد رخ اختیار کرلیا اور امتحانات کے لیے آئے ہوئے امیدواروں پر مبینہ طور پر حملہ کیا گیا۔ اس واقعہ کے بعد کلیان پولیس نے راج ٹھاکرے اور ایم این ایس کے ۸ ؍سرکردہ کارکنوں کے خلاف مختلف دفعات کے تحت کیس درج کیا تھا۔ طویل عرصے تک یہ کیس کلیان کورٹ میں چلتا رہا تاہم انتظامی وجوہات کی بنا پر بعد میں اسے تھانے کی عدالت میں منتقل کر دیا گیا۔

یہ بھی پڑھئے : غریب نگر میں انہدامی کارروائی سے متاثرین کا برا حال