متعدد تعلیمی مراکز کے بانی اور سماجی طور پر فعال عالم دین مولانا غلام محمد وستانوی کے سانحۂ ارتحال پر مالیگائوں کے علماء کا خراج عقیدت۔

 معروف عالم مولانا غلام محمد وستانوی کی رحلت پر مالیگاؤں میں غم و اندوہ کا ماحول دیکھا گیا۔ اُن کے انتقال کی اطلاع سے قبل ہی مالیگاؤں سے بہت سے افراد اکل کواں ( نندوربار ) پہنچ گئے تھے جبکہ انتقال کی تصدیق ہوجانے کے بعد کثیر تعداد میں نمازِ جنازہ و تدفین میں شریک ہوئے۔ مالیگائوں کے مقامی علمائے کرام نے اُن کی خدمات کو یاد کرتے ہوئے تعزیت مسنونہ ارسال کی ہے۔ 
  مفتی محمد اسماعیل قاسمی ( رکن شوریٰ دارالعلوم دیوبند، رکن اسمبلی شہر مالیگاؤں ) نے کہا کہ حضرت وستانوی کا انتقال ایک عہد کا خاتمہ ہے۔ انہوں نے دشوار کن مراحل طے کرتے ہوئے علوم وفنون کے مراکز قائم کئے۔ نندوربار جیسے علاقے کا انتخاب کرتے ہوئے دینی و عصری علوم کے ادارے تعمیر کئے۔ ‘‘ مفتی اسماعیل کے مطابق ’’اُن کی احسن خدمات سے نسلیں استفادہ کررہی ہیں اور یہ سلسلہ دراز رہے گا۔ ‘‘ 

یہ بھی پڑھئے:’’مولانا غلام محمد وستانوی کا سانحہ ارتحال عظیم خسارہ ہے‘‘

مولانا محمد عمرین محفوظ رحمانی ( سیکریٹری، آل انڈیا مسلم پرسنل لاء بورڈ ) نے کہا کہ مساجد، مدارس، مکاتب اور جامعات سے منسلک افراد کیلئے یہ بہت بڑا نقصان ہے۔ مولانا وستانوی نے کم وقفے میں بڑے کام کئے۔ شہر مالیگاؤں میں اُن کے فیض یافتگان کی بہت بڑی تعداد ہے۔ اس مسلم اکثریتی شہر سے انہیں محبت رہی۔ شہر کی علمی ترقی کیلئے وہ ہمہ وقت مددگار بھی بنے رہے۔ 
 مولانا ادریس عقیل ملّی ( صدر وفاق المدارس و مکاتب ) نے کہا کہ تعلیمی اداروں کا جال پھیلانے میں مولانا وستانوی نے دن رات محنت کی۔ اُن کی علمی خدمات کا دائرہ بہت وسیع ہے۔ تعزیت مسنونہ ارسال کرنے والی اہم شخصیات میں مفتی محمد حسنین محفوظ نعمانی( قاضی شرع، مالیگاؤں )، مولانا محب اللہ ندوی، مبشر مشتاق ( متولیان، معہد ملّت )، مولانا انیس الرحمٰن قاسمی ( مدرسہ محمدیہ )، مولانا عبدالقیوم قاسمی ( جمعیۃ علماء، ناسک )، مولانا آصف شعبان ( جمعیۃ علماء، مالیگاؤں ) وغیرہ شامل ہیں۔ واضح رہے کہ مالیگاؤں کے بہت سارے مکاتب ومدارس میں مولانا غلام محمد وستانوی کے ایصال ثواب، مغفرت اور درجات کی بلندی کیلئے دعائیں بھی کی گئی ہیں۔