وزیر اعظم نریندر مودی نے ہندوستانی سیاست میں ایک اہم سنگِ میل عبور کرتے ہوئے ۸؍ ہزار ۹۳۱؍ دنوں کے ساتھ ملک کے طویل ترین عرصے تک خدمات انجام دینے والے حکومتی سربراہ ہونے کا ریکارڈ قائم کیا ہے۔ گجرات کے وزیر اعلیٰ سے لے کر وزیر اعظم تک ان کے اس طویل سفر کو عوامی خدمت، استحکام اور مضبوط قیادت کی علامت قرار دیا جا رہا ہے، جبکہ بی جے پی کے متعدد سینئر لیڈران نے اس کامیابی پر انہیں مبارکباد پیش کی ہے۔

وزیر اعظم نریندر مودی نے ہندوستانی سیاست میں ایک تاریخی سنگ میل قائم کیا ہے۔ واضح ہو کہ وہ ملک کے سب سے طویل عرصے تک خدمات انجام دینے والے حکومتی سربراہ بن گئے۔ ۸؍ ہزار ۹۳۱؍ دنوں تک (گجرات کے وزیر اعلیٰ سے لے کر وزیر اعظم تک) ان کی قیادت کا سفر عوامی خدمت، دیانتداری اور ’’قوم سب سے پہلے‘‘ کے جذبے کی علامت ثابت ہوا ہے۔ اس کامیابی پر ملک بھر کے سینئر لیڈران نے انہیں مبارکباد دی ہے۔

نتن گڈکری کی مبارکباد
مرکزی وزیر برائے سڑک ٹرانسپورٹ اور شاہراہیں نتن گڈکری نے سوشل میڈیا پلیٹ فارم ایکس پر لکھا، ’’انتھک خدمت اور پختہ عزم سے حاصل کی گئی ایک تاریخی کامیابی۔ ہندوستان کے سب سے طویل عرصے تک خدمات انجام دینے والے حکومتی سربراہ بننے پر وزیر اعظم نریندر مودی کو دل کی گہرائیوں سے مبارکباد۔ انہوں نے پون کمار چاملنگ کے ۸؍ ہزار ۹۳۰؍ دنوں کے ریکارڈ کو پیچھے چھوڑ دیا ہے۔ گجرات سے لے کر قومی سطح تک ۸؍ ہزار ۹۳۱؍ دنوں کی مسلسل قیادت ان کی پختہ وابستگی، کام میں ایمانداری اور ’قوم سب سے بالا‘ کے جذبے کو ظاہر کرتی ہے۔ یہ کامیابی عوام کے مستقل اعتماد اور ہندوستان کی ترقی و پیشرفت کیلئے ان کے تاحیات مشن کا زندہ ثبوت ہے۔‘‘

یہ بھی پڑھئے: این ڈی ٹی وی بانیان کو راحت، دہلی ہائی کورٹ نے ایل او سی منسوخ کی

نرملا سیتا رمن کی مبارکباد
مرکزی وزیر خزانہ نرملا سیتارمن نے کہا، ’’ایک تاریخی کامیابی کے طور پر وزیر اعظم نریندر مودی ہندوستان کے سب سے طویل عرصے تک خدمات انجام دینے والے حکومتی سربراہ بن گئے ہیں۔ گجرات کے سب سے طویل مدت تک خدمات انجام دینے والے وزیر اعلیٰ سے لے کر وزیر اعظم کے طور پر ملک کی قیادت تک، ان کا سفر مستقل قیادت اور قوم کیلئے ان کی وابستگی کو ظاہر کرتا ہے۔‘‘

پیوش گوئل کی مبارکباد
مرکزی وزیر تجارت و صنعت پیوش گوئل نے کہا، ’’یہ ہمارے لئے فخر کی بات ہے کہ وزیر اعظم نریندر مودی نے سکم کے سابق وزیر اعلیٰ پون کمار چاملنگ کے ۸؍ ہزار ۹۳۰؍ دنوں کے ریکارڈ کو پیچھے چھوڑ دیا ہے۔ عوامی زندگی میں ۸؍ ہزار ۹۳۱؍ دن، پہلے گجرات کے وزیر اعلیٰ اور اب وزیر اعظم کے طور پر، ان کی ’عوامی خدمت‘ کا سفر ہمہ گیر ترقی کیلئے ان کے پختہ عزم کو ظاہر کرتا ہے۔ محنت اور قوم کی تعمیر کے عزم پر مبنی ان کے یہ سال ہندوستان کی ترقی کی داستان کو مسلسل مضبوط کر رہے ہیں۔‘‘

یہ بھی پڑھئے: آسکر نامزد ’’دی وائس آف ہند رجب‘‘ پر ہندوستان میں پابندی، تنازع

جے پی نڈا کی مبارکباد
مرکزی وزیر صحت جے پی نڈا نے کہا، ’’یہ قوم کیلئے فخر کا لمحہ ہے کہ وزیر اعظم نریندر مودی سب سے طویل عرصے تک خدمات انجام دینے والے حکومتی سربراہ بن گئے ہیں، جنہوں نے سکم کے سابق وزیر اعلیٰ پون کمار چاملنگ کے ۸؍ ہزار ۹۳۰؍ دنوں کے ریکارڈ کو پیچھے چھوڑ دیا ہے۔ گجرات کے وزیر اعلیٰ کے طور پر عوام کی خدمت سے لے کر وزیر اعظم کے طور پر ملک کو نئی بلندیوں تک لے جانے تک، ان کا سفر واقعی متاثر کن رہا ہے۔‘‘ انہوں نے مزید لکھا، ’’یہ سال ’ماں بھارتی‘ کیلئے ان کی گہری وابستگی اور عوام کی خدمت پر ان کی مسلسل توجہ کو ظاہر کرتے ہیں۔ ان کی قیادت میں، ہندوستان ’ترقی یافتہ بھارت‘ کے وژن کی جانب بڑھ رہا ہے۔ یہ پیش رفت عوام مرکوز پالیسیوں سے ممکن ہوئی ہے، جنہوں نے غریبوں، نوجوانوں، خواتین اور کسانوں کو بااختیار بنایا ہے۔ آج عالمی سطح پر ہندوستان زیادہ اعتماد اور اثر و رسوخ کے ساتھ کھڑا ہے۔ وزیر اعظم مودی کا کام ہمیشہ قوم کو اولین ترجیح دینے اور زمینی سطح پر حقیقی تبدیلی لانے پر مرکوز رہا ہے۔ یہ ایک ایسی قیادت ہے جو اعتماد، لگن اور واضح مقصد کے احساس پر قائم ہے۔‘‘

کرن رجیجو کی مبارکباد
مرکزی وزیر برائے پارلیمانی امور کرن رجیجو نے اس ریکارڈ کو غیر معمولی کامیابی قرار دیتے ہوئے کہا، ’’وزیر اعظم نریندر مودی آج ہندوستان میں سب سے طویل عرصے تک خدمات انجام دینے والے حکومتی سربراہ بن گئے ہیں۔ انہوں نے سکم کے سابق وزیر اعلیٰ پون کمار چاملنگ کے ۸؍ ہزار ۹۳۰؍ دنوں کے ریکارڈ کو پیچھے چھوڑ دیا ہے۔ گجرات کے وزیر اعلیٰ سے لے کر وزیر اعظم تک، ان کے ۸؍ ہزار ۹۳۱؍ دنوں کی خدمت ان کی انتھک لگن، ایمانداری اور ’قوم سب سے بالا‘ طرز حکمرانی کا زندہ ثبوت ہے۔ یہ اعتماد اور خدمت کا ایک انتہائی متاثر کن سفر ہے۔‘‘

یہ بھی پڑھئے: اسدالدین اویسی نے پاکستان کو ’’اسرائیل کا چھوٹا بھائی‘‘ قرار دیا

انا ملائی کی مبارکباد
تمل ناڈو بی جے پی کے رہنما کے اناملائی نے کہا، ’’حکومتی سربراہ کے طور پر ۸؍ ہزار ۹۳۱؍ دن، مسلسل ۳؍ لوک سبھا مینڈیٹ (۲۰۱۴ء، ۲۰۱۹ء، ۲۰۲۴ء) وزیر اعظم کے طور پر مسلسل تیسری مدت اور وزیر اعلیٰ کے طور پر ۱۲؍ سے زائد سال۔ آج وزیر اعظم نریندر مودی ہندوستان میں سب سے طویل عرصے تک خدمات انجام دینے والے حکومتی سربراہ بن گئے ہیں۔ انہوں نے سکم کے سابق وزیر اعلیٰ پون چاملنگ کے ۸؍ ہزار ۹۳۰؍ دنوں کے ریکارڈ کو پیچھے چھوڑ دیا ہے۔‘‘