کوکن کے اصلی ہاپوس آم ایک بار پھر تھانے کےشہریوں کیلئے دستیاب ہوں گے۔

کوکن کے اصلی ہاپوس آم ایک بار پھر تھانے کےشہریوں کیلئے دستیاب ہوں گے ۔ غیر سرکاری تنظیم سنسکار اور کوکن وکاس پرتشٹھان کے زیر اہتمام۱۹؍ ویں مینگو فیسٹیول کا انعقاد یکم سے ۱۰؍مئی تک گاؤںدیوی میدان میں کیا گیا ہے۔ منتظم اور ایم ایل اے سنجے کیلکر نے سنیچر کو ایک پریس کانفرنس میں یہ اطلاع دی۔

یہ بھی پڑھئے: ادھو ٹھاکرے اور فرنویس کی آدھی رات کو ملاقات؟

پریس کانفرنس میں دعویٰ کیا گیا ہے کہ چونکہ مینگو فیسٹیول میں کسانوں اور صارفین کے درمیان براہ راست ملاقات ہوگی، اس لئے تھانے کے شہریوں کو مناسب قیمتوں پر اصلی  ہاپوس آم دستیاب ہو سکیں گے ۔ فیسٹیول میں کوکن کے اصلی ہاپوس، پائری، رتنا، کیسر آم کے ساتھ ساتھ کوکن کی مختلف کوالٹی کی مصنوعات کے۴۵؍ اسٹال  بھی لگائے جائیں گے۔پریس کانفرنس میں بتایا گیا کہ گزشتہ چند برسوں میں موسم کی خرابی کی وجہ سے آم کی پیداوار میں کمی واقع ہو رہی ہے ۔ کوکن میں کل ایک لاکھ۸۰؍ہزار ہیکٹر اراضی پرآم کی کاشت کی جاتی ہے۔ ۲۰۲۳ءمیں کوکن میں آم کی پیداوار ۲؍لاکھ۵۶؍ ہزار میٹرک ٹن تھی۔ اس میں سے۱۹۸؍ کروڑ روپے کے آم ممبئی اور ملک بھر میں فروخت ہوئے اور۷۹؍کروڑ روپے کے آم برآمد کئے گئے۔ یہ آمدنی ہر سال کم ہوتی جارہی ہے اور۲۰۲۴ء میں یہ ایک لاکھ۲۸؍ہزار میٹرک ٹن رہی اور۱۲۶؍ کروڑ روپے کے آم فروخت ہوئے اور۵۴؍کروڑ روپے مالیت کے آم برآمد ہوئے۔۲۰۲۵ءمیں پیداوار ایک لاکھ۱۰؍ ہزار میٹرک ٹن تھی اور ملک بھر میں۱۰۰؍ کروڑ روپے کے آم فروخت ہوئے اور۴۵؍ کروڑ روپے کے آم برآمد کئے گئے۔

یہ بھی پڑھئے: حافظ سیّد زید صادق کی’جے ای ای مینس‘ میں نمایاں کامیابی

اس سال بے وقت بارش اور ابر آلود موسم کے باعث بعض مقامات پر آم سے پہلے درخت میں آنے والے پھول جل گئے اور بعض مقامات پر پھل گر گئے اور تھرپس بیماری اور وباءکی وجہ سے آم کی صرف ۱۵؍فیصد فصل کاشت ہوئی ہے۔ اس لئے گزشتہ۱۱؍ سال سے کوکن کے کسان مسلسل مالی بحران کا شکار ہیں۔ لہٰذا، ایم ایل اے سنجے کیلکر نے اپنے اعتماد کا اظہار کیا کہ ایک سمجھدار تھانے کے شہری اس ساری صورتحال پر ہمدردی کے ساتھ غور کرے گا اور مینگو فیسٹیول کے دوران زیادہ سے زیادہ آم خرید کر کوکن کے کسانوں کی مدد کرے گا۔رکن اسمبلی سنجے کیلکر، سنسکار سیوابھائی سنستھا کے صدر، ان کے ساتھ ایم ایل اے نرنجن ڈاؤکھرے، سابق ڈپٹی میئر سبھاش کالے، اشوک بھوئر، کارپوریٹر سیتارام رانے، بھرت چوان، وکاس پاٹل، کوکن وکاس پرتشٹھان کے راجیندر تاوڑے، سنسکار سنستھا کے مہیش ونیرکر اور دیگر پریس کانفرنس میں موجود تھے۔