فیفا ورلڈ کپ کے گروپ سی کے ایک سنسنی خیز مقابلے میں مراکش نے شاندار واپسی کرتے ہوئے ہیٹی کو۲۔۴؍گول سے شکست دے کر راؤنڈ آف ۳۲؍ کے لیے کوالیفائی کر لیا۔

فیفا ورلڈ کپ کے گروپ سی کے ایک سنسنی خیز مقابلے میں مراکش نے شاندار واپسی کرتے ہوئے ہیٹی کو۲۔۴؍گول سے شکست دے کر راؤنڈ آف ۳۲؍ کے لیے کوالیفائی کر لیا۔ مرسڈیز بینز اسٹیڈیم میں کھیلے گئے میچ میں پہلے ہی ورلڈ کپ سے باہر ہو چکی ہیٹی کی ٹیم نے بے خوف کھیل پیش کرتے ہوئے ابتدائی ۱۰؍ منٹ کے اندر برتری حاصل کر لی۔ لینی جوزف کی کوشش کے بعد پیدا ہونے والی صورت حال میں مراکش کے گول کیپر یاسین بونو سے گیند اپنے ہی گول میں چلی گئی اور یہ خود گول قرار دیا گیا۔

یہ بھی پڑھئے: ایرلنگ ہالینڈ نے اپنا پسندیدہ ہندوستانی پکوان بتایا، جانئے کیا ہے؟

 مراکش نے مسلسل دباؤ برقرار رکھا اور ۳۹؍ویں منٹ میں کپتان اشرف حکیمی نے ہیٹی کے گول کیپر جانی پلاسید کی ری باؤنڈ پر گیند کو جال میں پہنچا کر اسکور ۱۔۱؍گول  سے برابر کر دیا۔ پہلے ہاف کے اختتام سے قبل ہیٹی نے ایک بار پھر برتری حاصل کر لی، جب ولسن اسیڈور نے دور سے شاندار شاٹ کھیلتے ہوئے گیند کو گول کے اوپری کونے میں پہنچا دیا، جو ٹورنامنٹ کے بہترین گولوں میں شمار کیا جا رہا ہے۔

 مراکش نے ہمت نہیں ہاری اور پہلے ہاف کے اضافی وقت میں اسماعیل صیباری نے عمدہ فنش کے ذریعے اسکور ۲۔۲؍گول کر دیا، جس کے بعد دونوں ٹیمیں وقفے پر برابر رہیں۔ دوسرے ہاف میں مراکش نے کھیل پر اپنی گرفت مضبوط کر لی اور مسلسل حملے جاری رکھے۔ متعدد ضائع مواقع کے بعد متبادل کھلاڑی سفیان رحیمی نے  ۷۸؍ویں منٹ میں قریبی فاصلے سے گول کر کے مراکش کو پہلی بار ۲۔۳؍ کی برتری دلائی۔

یہ بھی پڑھئے: فیفا ورلڈکپ: امریکہ نے ایران کی فٹبال ٹیم پر سفری پابندیوں میں نرمی کر دی

اختتامی لمحات میں ہیٹی نے برابری کی بھرپور کوشش کی۔ ڈکنز نازون کی خطرناک فری کک پر مراکش کے گول کیپر نے شاندار بچاؤ کیا اور ٹیم کی برتری برقرار رکھی۔ اضافی وقت میں مراکش نے چوتھا گول بھی کر دیا، جب جیسیم یاسین نے سفیان رحیمی کی عمدہ کوشش کے بعد قریب سے گیند کو جال میں پہنچا دیا۔ وی اے آر سے جائزے کے بعد گول کو درست قرار دیا گیا، جس کے ساتھ ہی مراکش کے کھلاڑیوں اور شائقین نے فتح کا جشن منایا۔