مغربی ایشیا میں تیزی سے بگڑتی ہوئی فوجی صورتحال اور ایران پر ہونے والے حالیہ فضائی حملوں کے باوجود، ایرانی خواتین کی قومی فٹ بال ٹیم ویمنز ایشین کپ میں اپنی مہم جاری رکھنے کے لیے پرعزم ہے۔

 مغربی ایشیا  میں تیزی سے بگڑتی ہوئی فوجی صورتحال اور ایران پر ہونے والے حالیہ فضائی حملوں کے باوجود، ایرانی خواتین کی قومی فٹ بال ٹیم ویمنز ایشین کپ میں اپنی مہم جاری رکھنے کے لیے پرعزم ہے۔ بدھ کے روز ایک پریس کانفرنس کے دوران ۲۱؍ سالہ ایرانی فارورڈ سارہ دیدار اپنے وطن کی صورتحال کا ذکر کرتے ہوئے آنسوؤں پر قابو نہ رکھ سکیں۔ انہوں نے صحافیوں سے گفتگو کرتے ہوئے کہا کہ ’’ظاہر ہے کہ ہم سب اپنے خاندانوں اور پیاروں کے لیے فکر مند اور اداس ہیں۔ میں امید کرتی ہوں کہ میرے ملک کے لیے جلد اچھی خبریں آئیں گی اور میرا ملک مضبوطی سے زندہ رہے گا۔
ٹیم کی کوچ مرضیہ جعفری نے تسلیم کیا کہ کھلاڑیوں کے لیے اپنے گھر والوں کی فکر کے درمیان کھیل پر توجہ مرکوز کرنا انتہائی مشکل ہے۔ کوچ نے کہا کہ کوئی بھی جنگ سے محبت نہیں کرتا، لیکن ہم یہاں پیشہ ورانہ فٹ بال کھیلنے آئے ہیں اور پوری کوشش کر رہے ہیں کہ اگلے میچ پر توجہ دیں۔
انہوں نے آسٹریلیا میں مقیم ایرانیوں کی حمایت کا شکریہ ادا کرتے ہوئے کہا کہ وہ اپنی کارکردگی سے انہیں فخر محسوس کروانا چاہتی ہیں۔ ایران کو اپنے افتتاحی گروپ اے  میچ میں جنوبی کوریا کے ہاتھوں  ۰۔۳؍گول سے شکست کا سامنا کرنا پڑا تھا۔ اب ان کا اگلا مقابلہ میزبان آسٹریلیا سے جمعرات کوگولڈ کوسٹ سٹیڈیم میں ہو گا۔ آسٹریلوی مڈ فیلڈر ایمی سیئر نے بھی ایرانی کھلاڑیوں کی ہمت کی تعریف کی ہے جو اپنے ملک میں جاری شدید سیاسی عدم استحکام اور فوجی حملوں کے باوجود عالمی سطح پر مقابلہ کر رہی ہیں۔
  دفاعی چیمپئن  چین اور شمالی کوریا کی شاندار فتوحات
 آسٹریلیا میں جاری اے ایف سی ویمنز ایشین کپ کے گروپ بی میں ایشیا کی دو بڑی ٹیموں، چین اور شمالی کوریا نے اپنے پہلے میچ جیت کر ٹورنامنٹ کا بھرپور آغاز کر دیا ہے۔ دفاعی چیمپئن چین نے پہلی بار ایشین کپ کھیلنے والی بنگلہ دیشی ٹیم کو۰۔۲؍گول  سے شکست دی۔ اگرچہ چین رینکنگ میں بنگلہ دیش سے تقریباً ۱۰۰؍ درجے اوپر ہے، لیکن نوجوان بنگلہ دیشی ٹیم نے غیر معمولی مزاحمت دکھائی۔

یہ بھی پڑھئے:ایران اسرائیل کشیدگی: نورا فتحی کی امن اپیل پر سوشل میڈیا تنازع

میچ کے۴۰؍ منٹ تک بنگلہ دیش نے چین کو روکے رکھا۔ ہاف ٹائم سے چند منٹ قبل وانگ شوانگ نے دور سے شاندار گول کر کے چین کو برتری دلائی۔ اس کے فوراً بعد ژانگ روئی نے دوسرا گول کر کے بنگلہ دیش کی امیدوں کو دھچکا پہنچایا۔بنگلہ دیش کے کوچ پیٹر بٹلر کی ٹیم نے دوسرے ہاف میں بہترین دفاع کیا اور مزید کوئی گول نہیں ہونے دیا۔
تین بار کی سابق چیمپئن شمالی کوریا نے۲۰۱۰ء کے بعد پہلی بار اس ٹورنامنٹ میں واپسی کرتے ہوئے ازبکستان کو۰۔۳؍گول  سے یکطرفہ مقابلے میں ہرا دیا۔  مڈ فیلڈر میونگ یو جونگ میچ کی اسٹار رہیں، جنہوں نے کھیل کے پہلے ہی ہاف میں تینوں گول کر کے اپنی ہیٹ ٹرک مکمل کی۔میچ کی تفصیل: چھٹے منٹ میں پہلا گول کرنے کے بعد، میونگ نے دو پنالٹی ککس کو کامیابی سے جال کی راہ دکھا کر اپنی ٹیم کی جیت یقینی بنائی۔ازبکستان کی ٹیم کو شروع میں ہی بڑا دھچکا لگا جب ان کی گول کیپر گردن کی تکلیف کے باعث میچ سے باہر ہو گئیں۔

یہ بھی پڑھئے:کوپا ڈیل رے: بارسلونا کی شاندار واپسی ادھوری رہ گئی، ایٹلیٹیکو میڈرڈ فائنل میں

چین نو مرتبہ ایشین کپ جیت چکا ہے اور وہ اس ایونٹ کی سب سے کامیاب ٹیم ہے۔ دوسری جانب شمالی کوریا، جو۲۰۰۱ء، ۲۰۰۳ء اور ۲۰۰۸ء کی فاتح رہ چکی ہے، طویل عرصے بعد انٹرنیشنل فٹ بال میں واپسی کر رہی ہے اور ان کی موجودہ فارم نے دیگر ٹیموں کے لیے خطرے کی گھنٹی بجا دی ہے۔