فٹبال کے میدان میں اکثر کھلاڑیوں کے درمیان جھڑپ، فاؤل یا ریڈ کارڈ دیکھنے کو ملتا ہے، لیکن اینگوئلا اور اینٹیگوا و باربوڈا کے درمیان حالیہ مقابلے میں ریڈ کارڈ کی وجہ ایک ایسا واقعہ بنا جس نے سب کو حیران کر دیا۔

فٹبال کے میدان میں اکثر کھلاڑیوں کے درمیان جھڑپ، فاؤل یا ریڈ کارڈ دیکھنے کو ملتا ہے، لیکن اینگوئلا اور اینٹیگوا و باربوڈا کے درمیان حالیہ مقابلے میں ریڈ کارڈ کی وجہ ایک ایسا واقعہ بنا جس نے سب کو حیران کر دیا۔ اینگوئلا کے ۳۶ ؍سالہ فٹبالرایڈن اسکیپیو (Aedan Scipio)  کے تقریباً ایڑیوں تک پہنچنے والے غیر معمولی لمبے ڈریڈ لاکس بال کھینچنے پر حریف ٹیم کے دو کھلاڑیوں کو ریڈ کارڈ دکھا دیا گیا۔ 

En Ligue des nations de la CONCACAF, Aedan Scipio est entré en jeu avec Anguilla face à Antigua-et-Barbuda. Pendant le match, deux joueurs d’Antigua-et-Barbuda ont été expulsés… pour avoir tiré ses longues dreadlocks ! 😭 😂 pic.twitter.com/g9gluBfbM7

— Insolite-Foot (@InsoliteFoot) September 27, 2026

اینٹیگوا و باربوڈا نے میچ میں واضح برتری حاصل کرتے ہوئے پہلے ہی ہاف میں پانچ گول داغ دیے تھے۔ اس کے بعد ۶۹؍ویں منٹ میں ایڈن اسکیپیو کو اینگوئلا کی جانب سے میدان میں اتارا گیا۔ اس وقت اینگوئلا پانچ گول سے پیچھے تھا، تاہم اسکیپیو کی آمد کے بعد میچ میں ایک ایسا دلچسپ واقعہ پیش آیا جس نے نتیجے سے زیادہ توجہ حاصل کرلی۔  مقابلے کے دوران اسکیپیو نے اپنی ہی پنالٹی ایریا کے قریب گیند حاصل کی اور اسے لے کر آگے بڑھنے کی کوشش کی۔ اینٹیگوا و باربوڈا کے کھلاڑی  کیون گرین (Keon Greene) ، جو کچھ ہی دیر پہلے میدان میں آئے تھے، نے اسے روکنے کی کوشش میں اس کے انتہائی لمبے بال پکڑ لیے۔ ریفری نے اس حرکت کو قابل سزا قرار دیتے ہوئے گرین کو  ریڈ کارڈ  دکھا کر میدان سے باہر بھیج دیا۔ 

یہ بھی پڑھئے:ملائیشیا: سابق وزیر اعظم مآثیر محمد کی اہلیہ سیتی حسما کا ۱۰۰؍ سال کی عمر میں انتقال

واقعہ یہیں ختم نہیں ہوا۔ میچ کے اضافی وقت کے دوران اینٹیگوا و باربوڈا کے ایک اور کھلاڑی شالون نائٹ (Shalon Knight)  نے بھی اسکیپیو کو روکنے کی کوشش میں اس کے ڈریڈ لاکس پکڑ لیے۔ ریفری نے ایک بار پھر سخت کارروائی کرتے ہوئے نائٹ کو بھی ریڈ کارڈ دکھا دیا۔ یوں اینٹیگوا و باربوڈا، جو میچ میں پانچ گول کی برتری حاصل کرچکی تھی، اختتام پر  نو کھلاڑیوں کے ساتھ کھیل رہی تھی۔ اینٹیگوا و باربوڈا نے بالآخر میچ  ۵-۰ ؍گول  سے جیت لیا، لیکن مقابلے کے بعد سوشل میڈیا اور فٹبال شائقین کی توجہ اسکور لائن سے زیادہ ایڈن اسکیپیو کے غیر معمولی بالوں اور ان سے جڑے دو ریڈ کارڈز پر مرکوز ہوگئی۔ اسکیپیو کے ڈریڈ لاکس اتنے لمبے ہیں کہ وہ تقریباً اس کے ٹخنوں تک پہنچتے ہیں، جس کی وجہ سے وہ فٹبال کے میدان میں دور سے ہی نمایاں نظر آتے ہیں۔ رپورٹ کے مطابق یہی منفرد حلیہ اس میچ میں ایک غیر متوقع صورتحال کا سبب بھی بن گیا۔ 
اس مقابلے میں دونوں ریڈ کارڈز کا تعلق براہ راست اسکیپیو کے بال کھینچنے سے تھا، جو فٹبال کے عام واقعات میں یقیناً غیر معمولی نوعیت کا معاملہ ہے۔ دلچسپ بات یہ ہے کہ اینٹیگوا و باربوڈا کی پانچ گول کی شاندار فتح کے باوجود میچ کے بعد سب سے زیادہ زیرِ بحث موضوع اسکیپیو کے لمبے بال اور انہیں روکنے کی حریف کھلاڑیوں کی کوشش بنی۔

یہ بھی پڑھئے:نیشنل فلم ایوارڈز میں ممّوٹی کے روایتی استقبال پر تنقید

یہ میچ کونکا کیف نیشنز لیگ  کے تحت کھیلا گیا تھا۔ اینٹیگوا و باربوڈا عالمی درجہ بندی میں ۱۶۲؍ویں جبکہ اینگوئلا ۲۱۰؍ویں نمبر پر بتایا گیا ہے، اس لیے دونوں ٹیموں کے درمیان مقابلے میں طاقت کا فرق بھی نمایاں تھا۔ اس دلچسپ واقعہ نے ایک بار پھر ثابت کیا کہ فٹبال کے میدان میں کبھی کبھار ایسا غیر متوقع واقعہ بھی پیش آ سکتا ہے جو پورے میچ کے نتیجے سے زیادہ لوگوں کی توجہ حاصل کرلے۔