متحدہ عرب امارات نے سرمائی کھیلوں (ونٹر اسپورٹس) کی دنیا میں ایک اور سنگِ میل عبور کرتے ہوئے آئی آئی ایچ ایف آئس ہاکی ورلڈ چیمپئن شپ ۲۰۲۷ء ڈویژن ۲، گروپ اے کی میزبانی کے حقوق حاصل کر لیے ہیں۔

 متحدہ عرب امارات  نے سرمائی کھیلوں (ونٹر اسپورٹس) کی دنیا میں ایک اور سنگِ میل عبور کرتے ہوئے آئی آئی ایچ ایف آئس ہاکی ورلڈ چیمپئن شپ ۲۰۲۷ء ڈویژن  ۲، گروپ اے کی میزبانی کے حقوق حاصل کر لیے ہیں۔ یہ تاریخی فیصلہ سوئٹزرلینڈ کے شہر زیورخ میں منعقدہ انٹرنیشنل آئس ہاکی فیڈریشن (آئی آئی ایچ ایف) کے سالانہ اجلاس (کانگریس) کے دوران ہونے والی ووٹنگ میں کیا گیا۔
میزبانی کی اس دوڑ میں متحدہ عرب امارات کی پیشکش   کو ۱۴؍ ووٹ ملے، جبکہ اس کے مدمقابل ملک کروشیا کو ۱۱؍ووٹ حاصل ہو سکے۔ یہ کامیابی عالمی سطح پر یو اے ای کی تنظیمی صلاحیتوں اور جدید ترین کھیلوں کے بنیادی ڈھانچے پر بین الاقوامی فیڈریشن کے بڑھتے ہوئے اعتماد کا منہ بولتا ثبوت ہے۔

یہ بھی پڑھئے:آئرلینڈ کی ویسٹ انڈیز پر پہلی ٹی۲۰؍ فتح: اورلا پرینڈرگاسٹ کی آل راؤنڈکارکردگی

آئی آئی ایچ ایف (آئی آئی ایچ ایف) کی کانگریس میٹنگز میں یو اے ای ونٹر اسپورٹس فیڈریشن کے ایک اعلیٰ سطحی وفد نے شرکت کی، جس کی قیادت فیڈریشن کے نائب صدر ہامل احمد القبیسی کر رہے تھے۔ وفد میں سیکریٹری جنرل جمعہ الظاہری اور ٹیکنیکل ڈائریکٹر محمد عارف الجاچی بھی شامل تھے۔ اماراتی وفد نے اجلاس کے سامنے میزبانی کے لیے ایک انتہائی جامع اور مؤثر پریزنٹیشن پیش کی، جس میں چیمپئن شپ کے تنظیمی، تکنیکی اور آپریشنل پہلوؤں کو نمایاں کیا گیا تھا۔

یہ بھی پڑھئے:گیت ’’مسکارا‘‘ میں شروَری واگھ کا الگ انداز

شیڈول کے مطابق یہ عالمی چیمپئن شپ اپریل ۲۰۲۷ء میں العین شہر میں منعقد ہوگی، جس میں ڈویژن  ۲؍ (گروپ اے) میں شامل دنیا کی بہترین قومی ٹیمیں ٹرافی کے لیے ایک دوسرے کے سامنے ہوں گی۔ مڈل ایسٹ (مشرقِ وسطیٰ) کے خطے میں اس نوعیت کے بڑے آئس ہاکی ٹورنامنٹ کا یہ پہلا تاریخی انعقاد ہوگا۔