آج آفتاب نے اپنی امّی کی آنکھیں کھول دیں۔ سعدیہ بیگم پہلے تو آفتاب پر خوب ناراض ہوئیں، پھر اُن کی اپنی احتسابی نگاہوں نے خود کا احاطہ کیا تو اپنے رویے کی خود ہی سختی سے سرزنش کی۔ یہ وہ کس راستے پر چل پڑی تھیں۔ وہ تو ایسی بالکل بھی نہ تھیں اور نہ ہی اُس کے اجداد ہی اِس نظریے کے حامل تھے۔ کینہ، بغض یہ الفاظ تو اُس کے کردار کی ڈائری میں بالکل بھی نہیں تھے....

اچھا ہوا آج اُن کے بیٹے آفتاب نے اُنہیں ٹوک دیا۔ ورنہ وہ ہمیشہ کیلئے اپنی ہی نظروں میں گر جاتیں۔ آفتاب کی تنبیہ ایسی تھی جیسے وَن وے میں دوسری جانب سے آتی گاڑی کو روک لینا....

***

زندگی کی پُر پیچ راہوں پر چلتے چلتے سعدیہ بیگم کب اکیلی رہ گئیں اُنہیں پتہ ہی نہیں چلا۔ ہوش تو تب آیا جب اُنہوں نے محسوس کیا کہ بچّے جوان ہو کر اپنی ذاتی منزل کی طرف گامزن ہیں۔

یہ بھی پڑھئے: افسانہ: ریاکاری

زندگی کے سالہا سال سعدیہ بیگم نے شوہر نامدار کے ہوتے ہوئے بھی تنہا ہی طے کئے تھے۔ جس کا اُنہیں بے حد افسوس تھا۔ اختر سعدیہ کے شوہر، معاشی طور پر کمزور تھے۔ اِس کے باوجود سعدیہ بیگم نے اپنی اَنا اور بھرم کو قائم رکھا اور اپنے بچوں کی کفا لت خودداری سے کی۔ زندگی کے تپتی صحرا میں برہنہ پا چلتے چلتے وہ اکثر آبلہ پا ہو جاتیں لیکن کبھی ہمت نہیں ہاریں اور اپنے بچّوں کے سر پر مضبوط چٹان کی طرح سایہ فگن رہیں۔ خود بھوکی رہیں مگر بچّوں کی تعلیم کے تئیں کوئی سمجھوتہ نہیں کیا.... یہی وجہ تھی کہ آج اُن کے لخت ِ جگر عزت کی زندگی گزار رہے تھے۔

سعدیہ بیگم کا وہ سیاہ دن اُن کے ذہن کے دریچوں میں آج بھی تازہ دم تھا جب اُن کے اپنوں نے ہی اُن کے ارمانوں کو سولی پر چڑھا دیا تھا.... یہ اُن دِنوں کی بات ہے جب صحرائے شباب پر نخلستان جلوہ نما ہوا تھا۔ سولہ سترہ سالہ سعدیہ کے انٹر امتحان کا نتیجہ نکلا تھا۔

***

آج سعدیہ بے انتہا خوش تھی۔ وہ فرسٹ ڈویژن میں پاس ہوئی تھی۔ لمبا قد، چھریرا بدن اور گلابی رخساروں والی سعدیہ کو امّاں نے فرط جذبات سے گلے لگا لیا۔ آج اُن کی بھی محنت رنگ لائی تھی۔ بہنوں نے نذر نکالی تو بھائیوں نے خوشی میں مٹھائی تقسیم کی۔ خوش باش سعدیہ کے سپنے جواں تھے۔ اُس نے آگے پڑھنے کے لئے کمر کس لی۔ مگر کاتب ِ تقدیر کو کچھ اور ہی منظور تھا۔ بیری کے درخت پر لکھے اُس کے نام کے پھل پر ایک وزنی پتھر آن گرا اور وہ ٹوٹ کرنیچے آن گری۔ رشتہ اچھا تھا سو امّاں نے تھام لیا۔ اُس کی زندگی میں ایک تلاطم برپا ہوا جس کے منجھدھار میں اُس کی کشتی ہچکولے کھا تی رہی۔ وہ لاکھ منع کرتی رہ گئی مگر اُس کی ایک نہ چلی اور امّاں نے اُس کی نسبت طے کر دی....

اختر سعدیہ کے شوہر کے روپ میں ایک سخت گیر شخص تھے۔ بات بے بات طیش میں آنا اُن کی فطرت تھی.... ہنسنا تو دور مسکرانا تک وہ جانتے نہ تھے۔ شروع شروع میں سعدیہ اپنے نصیب سے شاکی رہی مگر جلد ہی خود کو ایک قلعے کی طرح مضبوط کر لیا۔ اُس نے ہر چند اختر کی طبیعت بدلنی چاہی، اُن کے اکھڑے مزاج کو اپنے رنگ میں رنگنا چاہا مگر کامیاب نہ ہوسکی.... سعدیہ کے سسرالی رشتے داروں میں سبھی قسم کے افراد شامل تھے۔ کچھ آگ لگا کر تماشہ دیکھنے میں ماہر تھے تو کچھ پرائی آگ میں ہاتھ سینکنے کا گُن رکھتے تھے۔ جلے پر نمک چھڑکنا اور آگ میں گھی ڈالنے والوں نے اُنہیں زندگی کا سکھ لینے ہی نہیں دیا۔ یہاں تک کہ دو گھڑی ساتھ چین سے بیٹھنے کا بھی موقع نہ دیا بلکہ ہر دم یہ آنکھ جمائے بیٹھے رہے کہ کب اُن دونوں میاں بیوی میں اَن بن ہو اور کب تین تیرہ ہو جائے۔ مگر سعدیہ کی بردباری، ازدواجی زندگی کی گاڑی کا ایندھن نہ بنتی تو آج اِس گاڑی کے پرزے پرزے بکھر گئے ہوتے۔ اُس کے تحمل و برداشت کا ہی نتیجہ رہا کہ آج وہ بری الذمہ تھیں۔

یہ بھی پڑھئے: افسانہ: آگہی

یوں تو اختر کا ساتھ فقط نام کو تھا.... لیکن سعدیہ کے لئے یہی غنیمت رہا۔ دل کا حال سننے والا اور دردِ دل سمجھنے والا کوئی نہ تھا۔ وہ رونے دھونے اور دوسروں کو دکھڑا سنانے کی عادی نہ تھی۔ وہ جانتی تھی ہر آزمائش کو ایک نہ ایک دن ختم ہوجانا ہے۔ ہر رات کی صبح ہوتی ہے.... سعدیہ کے دن ذمہ داریوں کیلئے وقف ہوتے مگر راتیں اُس کی اپنی ہوتیں۔ شب کی تنہائیوں میں وہ اپنے معبود کے قریب ہوتی۔

رفتہ رفتہ دن گزرتے گئے اور سعدیہ کو صبر آتا گیا۔ دھیرے دھیرے بچّے بھی بڑے ہوتے گئے اور پھر ایک ایک کر اپنی نجی زندگی میں کھو گئے۔ سعدیہ بیگم اِن ہی کے بیچ کہیں گُم ہوگئیں۔ اب اُن کے پاس وقت ہی وقت رہ گیا تھا۔ فارغ اوقات میں وہ پچھلی زندگی کی محرومیوں پر کڑ ھتیں، دوستوں اور رشتے داروں کی بے رُخی پر سوگ مناتیں اور اپنے ساتھ کی گئی حق تلفیوں اور ناانصافیوں پر بپھر جاتیں۔ نہ چاہتے ہوئے بھی ماضی کی کڑوی کسیلی یادوں کا سیاہ باب ایک جونک کی طرح اُن سے لپٹا ہوا ہی رہا۔

***

فروری کے اوائل کی کھلی کھلی دھوپ میں سعدیہ بیگم بالکنی میں بیٹھی دھوپ سینک رہی تھیں۔ سامنے میز پر ناشتہ لگا ہوا تھا۔ نشست کے پیچھے آم کے پیڑ پر بیٹھا کوّا مسلسل چلائے جا رہا تھا۔ بالکنی میں سجے پھولوں کی مہک اور گرم چائے سے اُٹھتی میٹھی خوشبو نے مل کر ماحول کو خوشگوار بنانے کی اپنی سی کوشش کر رکھی تھی۔