جنتر منتر پر کاکروچ جنتا پارٹی کے احتجاج نے غیر سنجیدہ نظر آنے والی اس نئی نسل اوراس کی طاقت کو سمجھنے کا موقع دیا جسے اب تک لاپروا، سست اورموبائل میں غرق رہنےوالی کہہ کر نظر انداز کیا جاتا رہاہے۔

غیر سنجیدہ نظر آنے والی سنجیدہ نسل نے اپنی تخلیقی صلاحیت کا لوہا منوا لیا

 جنتر منتر پر کاکروچ جنتا پارٹی  کے احتجاج نے غیر سنجیدہ نظر آنے والی  اس نئی نسل  اوراس کی طاقت کو سمجھنے کا موقع دیا جسے اب تک لاپروا، سست اورموبائل میں غرق رہنےوالی کہہ کر نظر انداز کیا جاتا رہاہے۔خود کو ’’کُول‘‘ قرار دینےوالی اس نسل نے ’’کُول‘‘رہتے ہوئے ،احتجاج کو انجوائمنٹ میں بدل دیا،  جن پولیس اہلکاروں نے ان پر لاٹھیاں برسائیں ،کبھی انہیں گلاب پیش کرکے شرمندہ کیا تو کبھی ’’واستے گونی ہوئیاں‘‘ کےسمجھ میں نہ آنےوالے نعرہ  کے ذریعہ ان کے ردعمل  سے لطف اندوز ہوئے۔   جین زی نے احتجاج کو صرف سڑک تک محدود نہیںرکھا بلکہ  جنتر منتر پر اٹھنے والا پلے کارڈ کیمرہ کے سامنے آتا  اور پھر انسٹا گرام کے ذریعہ پورے ملک میں نوجوانوں کے موبائل فون کی اسکرین پر پھیل جاتا۔ نعرہ ریل ریل میں تبدیل ہوجاتا اور  پولیس کی کارروائی میم میں بدل جاتی۔

یہ احتجاج جتنا جنتر منتر پر تھا،اس سے کئی گنا زیادہ نوجوانوں  کے موبائل اوران کے انسٹا گرام اکاؤنٹس پر تھا۔   یعنی   انسٹا گرام ’ورچوئل‘ جنتر منتر میں تبدیل ہوچکاتھا۔  اس مظاہرہ کی سب سے دلچسپ بات یہ تھی کہ نئی نسل اپنی ناراضگی کااظہار غصہ سے نہیں بلکہ طنز ومزاح کے ذریعہ کررہی تھی اور ایسا طنز کے غیرت مند کیلئے  ڈوب مرنے کا مقام ہو۔ مثال کے طور پر دھرمیندر پردھان کے استعفیٰ نہ دینے پر کسی نے طنز کیا کہ ملک میں روزگار کے مواقع  بہت کم ہیں اسی لئے  شاید  وزیر ِ محترم استعفیٰ نہیں دے رہے۔ایک نوجوان  دوسرے نے اسے کارپوریٹ ملازمت سے جوڑتے ہوئے مذاق کیا کہ شاید وہ تنخواہ  اور ’فل اینڈ فائنل سیٹلمنٹ‘ کا انتظار کر رہے ہیں۔ ۲۰؍ جولائی کو جب پارلیمنٹ مارچ کے موقع پر پولیس نے لاٹھی لے کر دوڑایا تو یہ ان نوجوانوں نے دوڑتے ہوئے اپنے ویڈیو ریکارڈ کرلئے۔ کسی نے اسے موبائل گیم’سب سے سرفر‘کی میوزک کےساتھ شیئر کیا تو کسی نے ’’چک دے انڈیا‘‘یا پھر’’بھاگ ملکھا بھاگ‘‘جیسی فلموں کے گانوں کو بیک گراؤنڈ میں  سیٹ کردیا۔ کسی نے بھاگتے ہوئے اپنا ویڈیو شیئر کیا اور کیپشن لکھ دیا کہ ’’تھینکس فار دی کارڈیو، دہلی پولیس۔‘‘ کارڈیو ٹریڈ مل پر دوڑنے کی ورزش ہے جس کا مقصد دل کو مضبوط کرنا ہے۔  ایک ایک لمحہ کا ویڈیو بنالینے میں یقین رکھنےوالی اس نسل نے اپنے گھروں  سے احتجاج کیلئے نکلتے ہوئے بھی ویڈیو ریکارڈ کر کے ریل بنا دیا۔  ایک طالبہ نے طنزیہ انداز میں لکھا کہ’’ حکومت کے زوال کو دیکھنے کے لیے تیار ہو رہی ہوں، لباس کے ساتھ ’ریڑھ کی ہڈی، جھمکے اور آئینی حق‘ بھی پہن لیا ہے۔‘‘ ایک  طالبہ نے  مظاہرہ سے واپسی پر اپنے میک اَپ کے  حوالہ سے پیغام دیا کہ’’ میک اَپ کا فاؤنڈیشن (بنیاد) حکومت کے مقابلے میں زیادہ مضبوط نکلا۔‘‘جنتر منتر   پر احتجاج کے ساتھ ہی نوجوان  سوشل میڈیا کیلئے ’’کنٹینٹ‘‘ بھی تیار کررہے تھے۔ یہ وہ کنٹینٹ تھا جو اُن کی مقبولیت میں  اضافہ  اور حکومت کی فضیحت کا ذریعہ بن رہا تھا۔ یہاں لہرائے جانے والے پلے کارڈ  ’کانٹینٹ  تھے ۔تختیوں پر تخلیقی صلاحیتیں اپنا لوہا منوا رہی تھیں۔  ایسے دلچسپ نعرے اور پیغامات  تھے کہ لوگ تصویریں  کھینچ کر سوشل میڈیا پر شیئر کئے بغیر نہ رہ سکے۔اس طرح نیشنل میڈیا کے نظر انداز کرنے کے باوجود یہ احتجاج تیزی سے عوام تک پہنچا اور  ہر گزرتے دن مزید لوگوں کو شرکت پر آمادہ کرتا رہا۔احتجاج میں آنے والا ہر نوجوان  رپورٹر بھی تھا اورکیمرہ مین بھی۔  یہاں کوئی  بیٹ مین بناہوا تھاتو کوئی  اسپائیڈر مین۔ کوئی  سپرمین اور آئرن مین تو کوئی ’’گوچو پوچو‘‘ جیسے الفاظ کے ساتھ وزیرتعلیم کو مخاطب کرکے استعفیٰ مانگ رہاتھا۔  جین زی  کے اس  احتجاج  کا پیغام بہت عام ہے کہ:ہم اپنا مطالبہ بھی کریں گے اور اسے اس انداز میں کریں گے کہ آپ اسے نظر انداز نہیں کر سکیں گے۔

یہ بھی پڑھئے: احتجاج کی بیلنس شیٹ: سرمایہ کس نے لگایا؟ قیمت کس نے ادا کی؟ منافع کتنا ہوا؟

طلبہ میں مقبول رہا ’’مجھے کو اپنے بینک کی کتاب دیجئے!‘‘

مظاہروں کیلئے جہاں نعروں کی ضرورت ہوتی ہے وہیں شاعری بھی مظاہرین کو کافی سہارا دیتی ہے۔ حالیہ مظاہروں میں یوں تو کئی نظمیں اور گیت گونجتے رہے مگر اُن میں سے ایک کو الگ الگ لوگوں نے اپنے اپنے طریقے سے گایا اور جو اصل گیت تھا اُس میں اپنی پسند کے حساب سے تبدیلیاں بھی کیں۔ یہ گیت ہے: مجھ کو اپنے بینک کی کتاب دیجئے، دیش کی تباہی کا حساب دیجئے‘‘۔ اس گیت کے تیور ایسے ہیں کہ ایک ایک لفظ دلوں میں اُتر جائے۔ اس سے قبل کہ ہم آپ کو اس گیت کے اصل خالق کا نام بتائیں، آئیے اس کا ایک بند سن لیں:

’’مجھ کو اپنے بینک کی کتاب دیجئے/ دیش کی تباہی کا حساب دیجئے/ گاؤں گاؤں زخمی فضائیں ہوگئیں/ زہریلی گھر کی ہوائیں ہوگئیں/ مہنگی شراب سے دوائیں ہوگئیں/ جائیے عوام کو جواب دیجئے/ مجھ کو اپنے بینک کی کتاب دیجئے‘‘ 

یہ گیت معروف شاعر منظر بھوپالی نے ۱۹۹۰ء کی دہائی میں لکھا تھا جب مہنگائی، بدعنوانی اور بے روزگاری سنگین مسئلہ بنی ہوئی تھی۔ منظر صاحب نے اسے پہلی مرتبہ امریکہ کے ایک مشاعرہ میں پڑھا تھا۔ حالیہ مظاہروں کے یوٹیوب ویڈیوز پر آپ سن سکتے ہیں کہ اس گیت میں اپنے حساب سے ترمیم کرکے اسے موجودہ وقت کے مسائل سے ہم آہنگ کر لیا گیا ہے۔ ایک ویڈیو میں کچھ اس طرح کے الفاظ ملتے ہیں: ’’مجھ کو اپنی بینک کی کتاب دیجئے/ دیش کی تباہی کا حساب دیجئے/ یووا سارے دیش کے سڑک پر آگئے/ نیٹ پیپر لیک پر تم چپی کھا گئے/ بھگوان کو بھی لو‘ٹ کے ٹھینگا دکھا گئے / جنتا کرے مانگ تو جواب دیجئے/ دیش کی تباہی کا حساب دیجئے۔

یہ بھی پڑھئے: جوہر یونیورسٹی، جو مسلم نام کی وجہ سے کچھ لوگوں کی آنکھوں میں کھٹک رہا ہے