ممبئی :رکشا اور ٹیکسی ڈرائیوروں کیلئے یکم مئی سے مراٹھی بولنا اور پڑھنا لازمی کر نے کافیصلہ دن بہ دن متنازع بنتا جا رہا ہے ۔ ایک طرف رکشا ڈرائیوروں کی تنظیمیں اس فیصلے کے خلاف احتجاج کرنے کی دھمکی دے رہی ہیں تو دوسری جانب سماجی اور مراٹھی ادارے فیصلے کی حمایت میں سڑکوں پر اُترنے کا انتباہ دے رہے ہیں۔ اس دوران بی جے پی رکشا اسوسی ایشن نے ڈرائیوروں کو مراٹھی سکھانےکی کلاس شروع کرنے کا بھی اعلان کیا ہے ۔ 

آٹو رکشا ڈرائیورز اونرس اسوسی ایشن کی جوائنٹ ایکشن کمیٹی کا کہنا ہے کہ ریاست میں تقریباً ۱۵؍ لاکھ رکشے ہیں اور تمام ڈرائیوروں نے قوانین پر عمل کرتے ہوئے لائسنس حاصل کئے ہیں ۔ ایسے میں اگر مراٹھی کو لازمی قرار دے کر لائسنس منسوخ کرنے کا اچانک فیصلہ کیا جاتا ہے تو اس سے ان کے روزگار کا مسئلہ ہو گا۔ چنانچہ اس فیصلے کو فوری طورپر واپس لینا چاہئے ۔ اس مطالبےپر ریاست کے آٹو رکشا اور ٹیکسی ڈرائیوروں کی طرف سے دستخط شدہ میمورنڈم ۲۸؍اپریل کووزیر ٹرانسپورٹ کو پیش کیا جائے گا ۔ اس کے بعد بھی اگر فیصلہ واپس نہیں لیا گیا تو ۴؍مئی سے ہر روز شہری اور دیہی علاقوں میں بڑے مقامات پر احتجاج کرنے کا انتباہ دیا گیا ہے ۔

رکشا یونین کے لیڈرششانک راؤ نے کہا کہ آر ٹی او قوانین کے مطابق پرمٹ حاصل کرنے کیلئے پہلے ہی کچھ شرائط لازمی ہیں جن میں ڈومیسائل سرٹیفکیٹ، پولیس ویریفکیشن اور مقامی زبان (مراٹھی) کا عملی علم شامل ہے۔ انہوں نے کہا کہ جب یہ تمام شرائط پوری کرنے کے بعد ہی پرمٹ جاری کئے گئے تو اب  زبان کی جانچ کے نام پر پرمٹ منسوخ کرنے کی دھمکی دینا غیرقانونی ہے۔ انہوں نے یہ بھی کہا کہ جب تک تقریباً ۱۵؍ لاکھ رکشا اور ٹیکسی ڈرائیور سڑکوں پر موجود ہیں، تب تک اولا، اوبر اور بائیک ٹیکسی جیسی نجی کمپنیاں زیادہ منافع نہیں کما سکتیں۔ ان کے مطابق یہ سخت قوانین روایتی رکشا کاروبار کو ختم کر کے نجی کمپنیوں کو فائدہ پہنچانے کیلئے بنائے گئے ہیں۔ 

یہ بھی پڑھئے: عازمین حج کی روانگی کے دوران مسائل کی بھی شکایتیں

حکومت کے فیصلے کا خیرمقدم

دریں اثناء ممبئی ڈبہ والا اسوسی ایشن کے صدر سبھاش تیلیکر نے حکومت کے مذکورہ فیصلے کا خیر مقدم کیا ہے۔ ان کا کہنا ہے کہ مہاراشٹر میں رکشا اور ٹیکسی ڈرائیور کاروبار کر رہے ہیں، اس لئے انہیں مراٹھی آنی چاہئے۔ 

مراٹھی ایلکرن سمیتی کے صدر گوردھن دیشمکھ نے کہا ہے کہ ’’مراٹھی کی کھلم کھلا مخالفت کرنے والوں کا براہ راست مقابلہ کرنے کا وقت آگیا ہے۔ مشترکہ مراٹھی لڑائی پھر شروع ہو گئی ہے ۔ مراٹھی کے خلاف کھلا احتجاج ہو ا اور ہم خاموش رہیں، ایسا نہیں ہونا چاہئے ۔ یہ جنگ نہیں ہارنی چاہئے۔ ۲؍ لاکھ مراٹھی بولنے والے رکشا اور ٹیکسی ڈرائیوروں کیلئے مراٹھی کو لازمی قرار دینے کے حکومت کے فیصلے کی حمایت کیلئے سڑکوں پر اُترنا چاہئے۔ جو فیصلہ ہو چکا ہے اسے مستقل رہنا چاہئے ۔‘‘

یہ بھی پڑھئے: چال کے ایک کمرہ سے ایم بی بی ایس تک، ڈاکٹر عدنان انصاری کاسفرجدوجہدبھرارہا

رکشا اورٹیکسی ڈرائیوروں کیلئے مراٹھی کلاس

بی جے پی ٹیکسی رکشا اگھاڑی سیل نے غیر مراٹھی ڈرائیوروں کیلئے خصوصی مراٹھی کلاس شروع کرنے کا فیصلہ کیا ہے ۔ اس اقدام کے ذریعے رکشا اور ٹیکسی ڈرائیوروں کو مراٹھی زبان سمجھنے میں مدد ملے گی ۔ ٹریننگ میں ڈرائیوروں کو روزمرہ استعمال کیلئے آسان مراٹھی گفتگو سکھائی جائے گی ۔ مثلاً کہاں جا رہے ہو ،بیٹھو ،چلو چھوڑتے ہیں اور اتنی رقم خرچ ہو گئی جیسے جملے سکھائے جائیں گے۔ اس کے علاوہ مسافروں کے ساتھ شائستگی سے بات کرنے اور صحیح الفاظ کے استعمال کے بارے میں بھی رہنمائی کی جائے گی۔ بی جے پی ٹیکسی رکشا اگھاڑی سیل کے صدر کے کے تیواری کے مطابق ’’اس کلاس کےذریعے مختصر وقت میں زیادہ سے زیادہ ڈرائیوروں کو تربیت دی جائے گی۔ اس اقدام سے مسافروں اور ڈرائیوروں کے درمیان رابطے میں حائل رکاوٹیں کم ہو جائیں گی۔ مراٹھی نہ جاننے والوں کی فہرست تیار کی جائے گی اور مختلف علاقوں میں جاکر اس کی تصدیق کے بعد مراٹھی پڑھانا شروع کیا جائے گا۔ یہ مہم اگلے ہفتے سے شروع ہوگی۔‘‘ انہوں نے مزید کہا کہ ’’ ۸۰؍ فیصد رکشا اور ٹیکسی ڈرائیور مراٹھی جانتے ہیں جبکہ باقی ڈرائیوروں کو مراٹھی کمیونیکیشن سکھائی جائے گی۔‘‘